Rasijskija vojski prarvalisia da samaha Hulajpola. Adno z padraździaleńniaŭ adstupiła biez zahadu
Na zaparožskim napramku ŭkrainskaj abarony ŭźnikła składanaja situacyja: padčas pierahrupoŭki adno z ukrainskich padraździaleńniaŭ samavolna adyšło z pazicyj. Z-za hetaha adkryŭsia fłanh abarony i rasijskija vojski zmahli prarvacca amal da samaha Hulajpola, paviedamlaje «RBK-Ukraina».
Fota: DeepState
Jak paviedamiŭ «RBK-Ukraina» pradstaŭnik Sił abarony Poŭdnia Uładzisłaŭ Vałošyn, niaŭzhodnieny adychod pakinuŭ susiedniaje padraździaleńnie biez prykryćcia. Rasijanie skarystalisia błytaninaj i drennymi ŭmovami nadvorja i zajšli ŭ fłanh ukrainskich vojskaŭ. U vyniku hetaha adbylisia bai. Niekalki ŭkrainskich vajskoŭcaŭ ličacca źnikłymi bieź viestak.
Niahledziačy na składanaści, ukrainskija vajskoŭcy trymajuć abaronu i sprabujuć pierahrupavać siły, kab bolš efiektyŭna arhanizavać abaronu Hulajpola. U rajonie siała Zielony Haj, pra jakoje paviedamlali jak pra nibyta ŭžo akupavanaje, iduć bai — ukrainskija siły praciahvajuć jaho baranić.
U hety ž dzień stała viadoma, što rasijskija vajskoŭcy ździejśnili čarhovaje vajennaje złačynstva — rasstralali piać ukrainskich abaroncaŭ, jakija trapili ŭ pałon u rajonie Hulajpola. Raniej pra heta paviedamiŭ prajekt Deep State.
Čytajcie taksama:
Z-vajenkary paviedamlajuć pra šturm Hulajpola
Pucinu dałažyli pra ŭziaćcie Kupianska. Voś čamu heta nie tak
Pahroza navisła nad Hulajpolem. Ci ŭdasca spynić rasijskaje nastupleńnie?
Rasijskija vojski zaniali čatyry siały pad Zaparožžam, pahroza navisła nad horadam Hulajpole