Tvitar pačaŭ pakazvać krainy pachodžańnia akaŭntaŭ. Raskazvajem, ci heta niebiaśpiečna i jak schavać svaju krainu
U tvitary stali pakazvać, ź jakoj łakacyi, mierkavana, viaducca tyja ci inšyja akaŭnty. Heta stała drennaj navinoj dla aktyvistaŭ z aŭtarytarnych krain, jakija starajucca nie śviacić svajo realnaje miescaznachodžańnie. Ale nasamreč davoli lohka amal schavać, adkul ty viadzieš akaŭnt — tłumačym jak.
Uładalnik X Iłan Mask. Fota: Beata Zawrzel / NurPhoto via Getty Images
Jak pracuje hetaja funkcyja i ci jana niebiaśpiečnaja?
21 listapada na płatformie X źjaviłasia novaja funkcyja — kali nacisnuć na datu dałučeńnia da płatformy, to ŭ mieniu budzie vidać nie tolki ahulnaja infarmacyja, ale i kraina pachodžańnia akaŭnta, i klijent, praź jaki karystalnik jaho viadzie. Vyhladaje heta tak:
Siudy treba nacisnuć, kab pakazałasia mieniu (u čyrvonaj ramcy)
Voś jakaja infarmacyja pakazvajecca — akramia publičnych źviestak, jašče i toje, dzie bazujecca akaŭnt i praz što jaho viaduć (BiełTA viadzie jaho praz sajt)
Pieršy i najbolšy skandał paśla ŭźnik z akaŭntami, jakija padtrymlivali Donalda Trampa. Naprykład, vyśvietliłasia, što adzin z bujnych kanałaŭ MAGA-tematyki (bolš za 400 tysiač padpisčykaŭ) viaduć z Uschodniaj Jeŭropy, fan-akaŭnt dački Trampa Ivanka News ź miljonam padpisantaŭ — ź Nihieryi, a adzin z kanałaŭ Trump Fan Army (500+ tysiač) — ź Indyi.
Aktyvisty z aŭtarytarnych krain vykazali zaniepakojenaść, niekatoryja navat nazyvajuć heta prymusovym raskryćciom danych i pieražyvajuć za svaju biaśpieku. Niekatoryja ludzi taksama miarkujuć, što tvitar budzie raskryvać danyja ichnich padarožžaŭ i zaśviecić pieramiaščeńni. Administracyja płatformy kaža, što padstavaŭ dla tryvohi niama — maŭlaŭ, usie ryzyki ŭličanyja.
Jašče adna prablema ŭ tym, što kali ty vykarystoŭvaješ VPN, to łakacyja budzie niedakładnaj. Praŭda, tvitar usio roŭna budzie pakazvać, z markieta jakoj krainy vy spampavali prahramu. I heta dadatkovaja ryzyka raskryćcia vašaha realnaha miescaznachodžańnia.
Naprykład, tak vyhladaje kanał papularnaj rasijskaj błohierki «polin, pierieviedi?» (@vs_polia). Jana siadzić praz VPN, tamu jaje akaŭnt «bazujecca» ŭ Niderłandach. Ale bačna, što jana siadzić praz klijent z rasijskaha App Store, praz što nieskładana vyličyć, što jana z Rasii.
Tak vyhladaje akaŭnt błohierki @vs_polia
Nasamreč, da kanca niezrazumieła, ci dapamoža heta paźbiahać raspaŭsiudu dezynfarmacyi. Bolšaja častka takich akaŭntaŭ nie błakujecca. A papularnaści jany čaściakom dasiahajuć kolkaściu kamientaroŭ, a nie jakaściu. Prynamsi pra niejkija mahčymyja miery suprać takich akaŭntaŭ nie paviedamlałasia.
Jak schavać krainu pachodžańnia akaŭnta ŭ tvitary?
Ale jość nałada, jakaja dazvalaje zrabić vaša miescaznachodžańnie bolš abstraktnym. Kab jaje ŭklučyć, treba ŭvajści ŭ nastrojki praz braŭzier na kampjutary abo smartfonie ci abnoŭlenuju prahramu dla smartfonaŭ.
Mieniu nastrojek u tvitary
Tam vybierycie punkt Privacy and safety. Adkryjecca hety punkt mieniu.
Vierchniaja častka mieniu Privacy and safety
Tam naciśnicie punkt About your account. Adkryjecca novaje mieniu.
Mieniu About your account
Dalej varta vybrać Use Region/Continent. Paśla hetaha źviestki pra łakalizacyju buduć bolš ahulnymi. Voś, naprykład, jak vyhladaje akaŭnt, jaki viadziecca z Polščy, paśla ŭklučeńnia nałady:
Akaŭnt X z uklučanaj naładaj Use Region/Continent
{DONATE_PAYPAL}