Pamierła 39‑hadovaja ilustratarka, jakaja ŭ 2020 hodzie stvarała stykiery ŭ padtrymku represij i AMAPu

U Minsku raźvitalisia z dyzajnierkaj Hannaj Pierarosłaj, jakaja pracavała pad psieŭdanimami Ascha i Pink Shark.

Hanna Pierarosłaja. Fota ź jaje Threads

Pra raźvitańnie paviedamili na jaje staroncy ŭ instahramie.

U školnyja hady Hanna vałancioryła i davoli časta jeździła ŭ Aŭstryju. Jana pisała, što toj dośvied vielmi paŭpłyvaŭ na jaje.

Žančyna ŭ 2009 hodzie skončyła fakultet niamieckaj movy Minskaha dziaržaŭnaha linhvistyčnaha ŭniviersiteta, a paralelna — kurs hrafičnaha dyzajnu ŭ Biełaruskim dziaržaŭnym technałahičnym univiersitecie (2007—2009). Paśla hetaha jana skončyła prahramu «Web-dyzajn i kampjutarnaja hrafika» ŭ Instytucie pavyšeńnia kvalifikacyi pry BNTU. 

Pra siabie Hanna raskazvała ŭ sacsietkach, što lubić kampjutarnyja hulni, padarožžy i kiravańnie, a taksama akuł — mienavita adtul jaje psieŭdanim.

Hanna Pierarosłaja. Fota ź jaje Threads

Žančyna prafiesijna zajmałasia UX/UI i hrafičnym dyzajnam bolš za 10 hadoŭ, i, miarkujučy pa ŭsim, pačynała ŭ IT-kampanii SaM Solutions. Taksama Hanna papracavała ŭ AAT «Novy pavarot» — kampanii, jakaja raspracoŭvaje prahramy, što dapamahajuć zdać tearetyčny ekzamien u DAI.

U 2020 hodzie Hanna stvaryła stykiery ŭ padtrymku represij, AMAPa («silaomon») i Łukašenki («zabatku»).

Toj samy ścikierpak Hanny

Hanna — udzielnica zajezdaŭ u padtrymku Alaksandra Łukašenki

Vajnu va Ukrainie žančyna taksama padtrymała i apublikavała ŭ instahramie malunak z babulaj, jakaja niasie saviecki ściah.

Hanna aburałasia, kali Arciemij Lebiedzieŭ zrabiŭ tatuiroŭku, na jakoj možna razhledzieć słova na biełaruskaj movie.

Svaju nieluboŭ da biełaruskaj movy žančyna ŭ sacsietkach tłumačyła čaćviorkaj, jakuju joj, vydatnicy, u piatym kłasie pastaviła nastaŭnica biełaruskaj movy: «Za toje, što nie chacieła vydavać rydalnyja emocyi, kali raskazvaju vieršy pra biedy sialan, jakija kaliści žyli».

Viadoma, što letaś dyzajnierka malavała ilustracyi dla haziety «Znamia junosti».

U sacsietkach jana krychu dzialiłasia tym, što zmahajecca z ankałohijaj.

U Threads Hanna sioleta cikaviłasia: «Čamu ŭ taksi niama takoj pasłuhi, jak advieźci ciabie da doktara, pačakać pad kabinietam, padtrymać, kali ŭsio kiepska?» U kamientaryjach joj raili brać z saboj siabroŭ, ale Hanna adkazvała: «U siabroŭ, jak praviła, pa dvoje dziaciej i praca».

U Hanny zastałasia vaśmihadovaja dačka.

Kamientary da artykuła