8‑hadovuju dziaŭčynku ź invalidnaściu nie chacieli puskać u minskaje kafe. Kazali, što jaje vazok zajmaje šmat miesca
Pra aburalnuju historyju staŭleńnia da ciažkachvoraj Kaci Vinahradavaj u kafe Golden Coffee raspaviała jaje maci Aksana ŭ instahramie.
Kacia Vinahradava. Fota ź jaje staronki ŭ Threads
Sama siamja z Kobryna, u vaśmihadovaj Kaci Vinahradavaj ciažkaje hienietyčnyje zachvorvańnie — śpinalnaja ciahlicavaja atrafija. Jakraz ciapier dla dziaŭčynki sprabujuć sabrać bolš za 1,8 miljona dalaraŭ na preparat Zolgensma.
Miarkujučy pa infarmacyi ŭ sacyjalnych sietkach, adbyłosia ŭsio ŭ subotu. U kampanii byli sama Kacia (dziaŭčynka pierasoŭvajecca na invalidnaj kalascy) z maci, vałanciorki, a taksama Vieranika Kasač — čempijonka śvietu i Jeŭropy pa spartyŭnych tancach na invalidnych vazkach.
U handlovym centry «Dana Moł», jaki štohod pierad Novym hodam karystajecca šalonaj papularnaściu praz svaje šykoŭnyja dekaracyi, jany vyrašyli zajści ŭ kafe Golden Coffee, kab źjeści desiert.
Ale ž, pa słovach Aksany Vinahradavaj, ich nie chacieli puskać u kafe praz toje, što Kacia i Vieranika byli na invalidnych vazkach. Supracoŭniki Golden Coffee kazali, što vazki buduć pieraškadžać ruchu inšych haściej, a taksama aficyjantaŭ.
Paśla taho, jak u supracoŭnikaŭ kafe zapatrabavali knihu skarh i prapanoŭ, tyja ŭsio ž dazvolili kampanii zaniać miescy i zrabić zamovu.
U instahramie Aksany Vinahradavaj źjaviŭsia aburalny dopis: «A vy kažacie, čamu ŭ mamy ruki apuskajucca. Dyk tamu, što ludzi złyja, tamu, što kožny dzień nieabchodna sutykacca z takimi situacyjami».
Jana prosić Golden Coffee pierahladzieć svaje kaštoŭnaści i staŭleńnie da dziaciej ź invalidnaściu.
Pakul dyrekcyja Golden Coffee nijak nie kamientavała situacyju, choć šmat aburanych ludziej tehajuć akaŭnt kafe i patrabujuć adkazu.
Ale adna z vałanciorak, jakija dapamahajuć Kaci i jaje maci, napisała, što ź joj vyjšła na suviaź dyrektarka Golden Coffee. Taja vybačyłasia i paabiacała patelefanavać paźniej, kali pierahladzić zapisy z kamier videanazirańnia.
Čytajcie taksama:
«Ja chaču pazbavicca ŭsich klijentaŭ z noŭtbukami!»: uładalnik staličnaj kaviarni padzialiŭsia bolem