«Šlachcica Zavalniu» ŭpieršyniu pierakłali na anhielskuju movu
Vydaviectva Grunwald, jakoje śpiecyjalizujecca na vydańni biełaruskich knih u pierakładzie na anhielskuju movu, vypuściła kultavy tvor Jana Barščeŭskaha «Šlachcic Zavalnia, albo Biełaruś u fantastyčnych apaviadańniach».
Anhłamoŭnaje pierastvareńnie Voli Janoŭskaj maje nazvu «Nobleman Zavalnya, or Belarus in Fantastical Tales», piša bellit.info.
Pieršy anhłamoŭny pierakład tvora Jana Barščeŭskaha vyjšaŭ u kastryčniku 2025 hodu. Pakul tolki ŭ miakkaj vokładcy i z čorna-biełami ilustracyjami. Kniha ŭžo dastupnaja dla nabyćcia praz sajt vydaviectva, na Amazon i inšych bujnych onłajn-placoŭkach. Taksama možna prydbać elektronnuju viersiju.
U pačatku 2026 hodu čakajecca vychad premijalnaha vydańnia ŭ ćviordaj vokładcy z 83 kalarovymi ilustracyjami ad Nasty Li.
Pierastvareńnie Voli Janoŭskaj było zroblena na asnovie biełaruskaha kłasičnaha pierakładu Mikoły Chaŭstoviča z paraŭnańniem z polskim aryhinałam «Šlachcica Zavalni» samoha Jana Barščeŭskaha.
Bolš pra toje, jak rychtavałasia kniha, jak išła praca nad pierakładam i inšyja cikavostki možna pahladzieć u onłajn-prezientacyi, jakaja prajšła ŭ miežach fiestyvalu intelektualnaj knihi «Pradmova».