ZŠA prypyniaje rozyhryš hryn-kartaŭ
Pryčyna — stralba ŭ Braŭnaŭskim univiersitecie.
Fota: Pamela Smith / AP
Ministr unutranaj biaśpieki ZŠA Kryści Noem paviedamiła ab prypynieńni prahramy DV1, «kab harantavać, što nivodzin amierykaniec bolš nie pacierpić ad hetaj katastrafičnaj prahramy».
«Strałok z Braŭnaŭskaha ŭniviersiteta Kłaŭdya Manueł Nievies Valente ŭjechaŭ u ZŠA pa imihracyjnaj vizie ŭ miežach prahramy łatarei raznastajnaści (DV1) u 2017 hodzie i atrymaŭ hryn-kartu. Hetamu žachlivamu čałavieku nikoli nie varta było dazvalać ujezd u našu krainu.
U 2017 hodzie prezident Tramp damahaŭsia spynieńnia hetaj prahramy paśla razburalnaha najezdu hruzavika ŭ Ńju-Jorku, ździejśnienaha terarystam IDIŁ, jaki ŭjechaŭ u krainu pa prahramie DV1 i zabiŭ vosiem čałaviek», — napisała Kryści Noem.
U subotu, 13 śniežnia, u kampusie Braŭnaŭskaha ŭniviersiteta ŭ Providensie mužčyna adkryŭ ahoń pa studentach padčas padrychtoŭki da ekzamienaŭ. Zahinuli dvoje, jašče dzieviać atrymali ranieńni.
18 śniežnia było znojdziena cieła strałka — 48‑hadovaha Kłaŭdya Manueła Nieviesa Valente. Jaho taksama źviazvajuć z zabojstvam prafiesara Masačusieckaha technałahičnaha instytuta.
Łatarejaj hryn-kart štohod razyhryvajecca kala 50 tysiač imihracyjnych viz (DV1). Pieramožcy łatarei mohuć ujechać u ZŠA i atrymać płastykavuju hryn-kartu. Bolšaja častka tych, chto ŭjechaŭ, zastajucca ŭ ZŠA i potym atrymlivajuć hramadzianstva.