Paźniak pra śmierć Miełkaziorava: «Jak što lepšaje — tracicca. Jak što horšaje — množycca»
Vieteran biełaruskaha ruchu Zianon Paźniak na svajoj staroncy ŭ fejsbuku apublikavaŭ karotki post u pamiać pra niečakana pamierłaha ŭ noč z 20 na 21 śniežnia žurnalista Mikitu Miełkaziorava.
Mikita Miełkazioraŭ. Fota: «Naša Niva»
«Ščyry žal z pryčyny niečakanaj śmierci Mikity Miełkaziorava. Heta čałaviek, jaki ŭ praklaty čas staŭ zdolnym dla Biełarusi, dapamahaŭ joj svaim biełaruskim słovam, impetam i talentam. Jon upłyvaŭ na častku ludziej, najpierš maładych, da jakich nie dabiahali sensy inšych razvažańniaŭ.
Škoda. Vielmi škoda. U 37 hadoŭ nie čakajuć śmierci. A tut jana naskočyła. Nam, biełarusam, tak nie šancuje. Jak što lepšaje — tracicca. Jak što horšaje — množycca.
Viečnaja pamiać dobramu biełarusu. Niachaj inšyja praciahnuć jaho žyvy biełaruski šlach», — napisaŭ Zianon Paźniak.