Siła tyktoka. Žančyna paskardziłasia na pavolny internet ad «Biełtelekama» — tam raptam adreahavali
Biełaruska zapisała videa, u jakim pakazała nizkuju chutkaść internetu ad viadomaha pravajdera. Praź jaje zahruzka filmaŭ na kaladny viečar była niemahčymaj.
Biełaruska Palina paskardziłasia na nizkuju chutkaść internetu ad apieratara RUP «Biełtelekam» u svaim tyktok-akaŭncie. Pa jaje słovach, jana nabyła taryf pa novaj akcyi, jakaja abiacała pavialičyć chutkaść internetu. Ale hety anłajn-pakiet nie apraŭdaŭ jaje čakańniaŭ, piša BGmedia.
Uviečary 25 śniežnia žančyna zaŭvažyła, što abiacanaja akcyja nijak nie palepšyła jakaść samoj sietki. Film, jaki jana płanavała pahladzieć, nie chacieŭ zahružacca. Voś, jak situacyju kamientuje sama aŭtarka rolika:
«Pavažany Biełtelekam, źviartajusia da vas z padziakaj. Toje, što ŭ hety kaladny viečar ja nie maju mahčymaści pahladzieć svoj ulubiony miuzikł «Viečiera na chutorie bliz Dikańki». Usio dziakujučy vašamu vysokachutkasnamu internetu i «kłasnym» akcyjam «Dapłaci piać rubloŭ i atrymaj jašče bolš chutki internet». Dziakuj za vašuju chutkaść, klijentaaryjentavanaść! I toje, što majstar pryjdzie tolki ŭ tym vypadku, kali my pahodzimsia na hetuju kłasnuju akcyju. Dziakuj, Biełtelekam. Da pabačeńnia, Biełtelekam», — adznačaje jana.
Praź niekalki dzion paśla publikacyi videa ŭ tyktoku da minčanki źviarnulisia pradstaŭniki «Biełtelekamu», i prapanavali joj vyrašeńnie prablemy.
U vyniku supracoŭnik zamianiŭ roŭter, i internet, jak kaža sama žančyna, zapracavaŭ. Videa i inšyja ciažkija fajły pačali dobra zahružacca, choć i nie tak, jak joj chaciełasia.
Aŭtarka rolika radaja vyniku, adnak zadałasia pytańniem, čamu dla vyrašeńnia prablemy abaviazkovaja ahałoska ŭ tyktoku, a prostych telefonnych zvankoŭ apierataru ciapier niedastatkova.
Padobny vypadak z «Biełtelekamam» — nie ŭpieršyniu.
Raniej biełarusy nieadnojčy skardzilisia na jakaść pasłuh ad apieratara «Biełtelekam». Hałoŭnyja prablemy, ź jakimi jany sutykalisia — telebačańnie i internet, «što visnuć», pastajannyja zboi ŭ suviazi.
Voś, jak biełarusy kamientujuć pracu apieratara pad videa minčanki.
«U nas ničoha nie ciahnie, tolki hrošy».
«Što «Biełtelekam», što mabilnaja suviaź — abniać i płakać. Nie zrazumieła, za što my płocim. Musić, za ŭłasnyja niervy».
«U «Biełtelekamie» taryfy roznyja, a chutkaść adna. Tolki hrošy dziaruć ź ludziej».
U Ministerstvie suviazi, u svaju čarhu, pryznajuć prablemy ź jakaściu internetu. Ale adznačajuć, što ŭsia prablema ŭ tym, što «infrastruktura prosta nie paśpiavaje». Prablemy paharšajuć budaŭnictva vysotak biez abaviazkovaj mabilnaj infrastruktury, mietalizavanyja vokny, jakija ŭ 1000 raz hasiać sihnał, niedachop častot i bazavych stancyj, a taksama sastarełyja sietki ŭ rajcentrach i siołach.
Całkam likvidavać prablemu pa ŭsioj krainie abiacali ažno da 2030 hoda.