Ci budzie hurt «Piatla prychilnaści» praciahvać vystupać z novym vakalistam, bieź Illi Čarapko?
U kastryčniku — śniežni 2025 hoda post-pank hurt «Piatla prychilnaści» adyhraŭ svoj apošni mižnarodny tur. Finalnym jon staŭ pa rašeńni vakalista Illi Čarapko-Samachvałava, jaki syšoŭ z kalektyvu, historyja jakoha ciahnułasia z 2004 hoda.
«Piatla prychilnaści». Fota: staronka hrupy ŭ fejsbuku
Lidar hurta patłumačyŭ svaju matyvacyju žadańniem ruchacca dalej: «Asnoŭnaj pryčynaj stała žadańnie pierajści na nastupny ŭzrovień. Užo niekalki miesiacaŭ ja pracuju nad ułasnym prajektam i źbirajusia pryśviacić jamu ŭvieś svoj čas».
Praŭda, paźniej stała viadoma, što ŭ spravie zamiašana šmat składnikaŭ.
«Čarapko raźlivu 2023‑2024 hadoŭ bolš nie isnuje, hety čałaviek pamior. Ja zmoh pahasić knaty svajho praktyčna pažyćciovaha ałkahalizmu, całkam pazbavicca ad nabyćcia apošnich hadoŭ — prychilnaści da kakainu, a jašče zaadno ad šmathadovych taksičnych adnosin.
Acaniŭ značnaść ludziej, pa-sapraŭdnamu kaštoŭnych dla mianie, pierastaŭ słuchać niaprošanych daradcaŭ i pačaŭ sam prymać rašeńni — u vyniku zmoh viarnucca dadomu, choć užo i nie maryŭ pra heta», — padzialiŭsia svaimi vynikami hoda muzyka.
«Piatla prychilnaści». Fota: staronka hrupy ŭ fejsbuku
«Piatla prychilnaści» za čas svajho isnavańnia vypuściła siem poŭnafarmatnych albomaŭ. Apošni ź ich — «Supierpazicyja» —vyjšaŭ u 2024 hodzie i byŭ całkam biełaruskamoŭny. Hurt byŭ u dobraj formie i źbiraŭ pa Jeŭropie poŭnyja placoŭki fanataŭ — dla mnohich prychilnikaŭ jaho razvał staŭ šokam. Na heta Illa Čarapko reahavaŭ u sacsietku pa-fiłasofsku.
«Heta ja syšoŭ z hrupy, a nie vyhnaŭ adtul usich astatnich. Usie hetyja hady mnie raskazvali, što ŭsie ŭdzielniki — raŭnaznačnyja tvorčyja adzinki. Padčas isnavańnia hurta byli vypadki, kali my hrali kancerty to biez hitary, to biez basu, a kaliści, nie pry ciapierašnim bubnaču, ale takoje taksama było — biez barabanaŭ. Z hrupy prosta syšoŭ Illa Čarapko — vakał.
Hurt całkam moža dalej praciahvać svajo tryŭmfalnaje šeście. Vakalistaŭ tam chapaje. Prychilnikam hrupy ja addaŭ bolš za 20 hadoŭ svajho žyćcia i 7 albomaŭ, jany nikudy nie padzienucca i nazaŭždy zastajucca vašymi».
Viadoma, što Illa chacieŭ syści, nie adyhryvajučy navat apošni vosieński, raźvitalny tur. Ale jaho pierakanali, u tym liku namiaknuŭšy na niaŭstojku, jakuju b pryjšłosia vypłacić pry takim rašeńni, bo ŭžo byli zamacavanyja damoŭlenaści ź placoŭkami.
Pa infarmacyi «Našaj Nivy», u hetym tury Illa pieramiaščaŭsia pa haradach asobna ad inšych udzielnikaŭ hurta. Prychilniki adznačali taksama chałodnaść u kamunikacyi pamiž muzykami na finalnych vystupach.
«Piatla prychilnaści». Fota: staronka hrupy ŭ fejsbuku
Dyk ci praciahniecca historyja «Piatli» ź inšym vakalistam?
Muzyki admovilisia kamientavać ich płany na budučyniu, u tym liku tamu, što ŭsim niaprosta dajecca pastaŭlenaja ŭ prajekcie kropka. Ale, pa infarmacyi «Našaj Nivy», na hety momant nichto nie źbirajecca adradžać «Piatlu prychilnaści» ŭ novym składzie ci inšym farmacie. Hurt sapraŭdy spyniŭ svajo isnavańnie.
Illa Čarapko ciapier zajmajecca svaim novym prajektam. Basista Cimafieja Savickaha i bubnača Alaksieja Tarasieviča zaŭvažyli ŭ novym post-pank prajekcie «Prypiać», dzie na pieršym płanie — 17‑hadovy syn basista Kazimir. Hitaryst Dźmitryj Papłaŭski vykładaje ŭroki hrańnia na svaim instrumiencie, a Ivan Sieliščaŭ zaŭsiody byŭ dobrym arhanizataram kancertaŭ i turaŭ, tamu, chutčej za ŭsio, i praciahnie hetym zajmacca.