Jak vyhladaje samaja tannaja kvatera ŭ Minsku i kolki za jaje chočuć. Heta jašče i trochpakajoŭka!

Praŭda, jość niuansy.

Interjery ŭ samaj tannaj kvatery Minska. Fota: realt.by

Naprykancy 2025 hoda ceny nieruchomaści ŭ Minsku abnavili histaryčny rekord, ale nabyć žytło sa staličnaj prapiskaj mienš jak za 50 tysiač dalaraŭ usio jašče realna. Prablema ŭ tym, što takaja kvatera — faktyčna ŭ pryharadzie i ŭ kiepskim stanie.

Samaja tannaja kvatera ŭ stalicy pradajecca za 46 tysiač dalaraŭ. Stolki prosiać za trochpakajoŭku pa adrasie: vuł. Prafsajuznaja, d. 9. Ahulnaja płošča — 67 kvadrataŭ, tamu mietr tam kaštuje ŭsiaho 685 dalaraŭ.

Interjery ŭ samaj tannaj kvatery Minska. Fota: realt.by

Heta vielmi tanna na fonie siaredniaha koštu mietra bolš jak 2000 dalaraŭ.

Znachodzicca kvatera ŭ cahlanym 6‑kvaternym domie 1945 hoda pabudovy, da jakoha paźniej była dadadziena prybudova.

Dom z prybudovaj, u jakim znachodzicca trochpakajoŭka za 46 tysiač. Fota: realt.by

Zhodna z płanam, u kvatery dva žyłyja pakoi pa 17 kvadrataŭ u asnoŭnaj častcy doma, kuchnia na 13 mietraŭ u prybudovie i jašče adzin pakoj na 16 mietraŭ, jaki aficyjna zaviecca letnim pamiaškańniem.

Fota: realt.by

Mahčyma, adzin z pakojaŭ, jaki źjaŭlajecca prachadnym i ŭ jakim staić piečka, nie maje voknaŭ praz prybudovu.

Jak bačna pa fota, ramont u pamiaškańni rabiŭsia vielmi daŭno, ale heta nie adziny minus. Choć farmalna pakupnik atrymlivaje staličnuju prapisku, dom hety znachodzicca davoli daloka za MKADam — pobač z čyhunačnaj stancyjaj «Kaladzičy».

Fota: skrynšot ź Jandeks Panaramy

Čyhunka idzie adrazu za domam, što taksama nie dadaje kaštoŭnaści takomu žytłu.

Kamientary da artykuła