Letaś u Polščy ŭdvaja pavialičyłasia kolkaść prymusova departavanych biełarusaŭ

U 2025 hodzie Polšča značna pavialičyła kolkaść prymusovych vysyłak hramadzian Biełarusi — amal udvaja ŭ paraŭnańni z papiarednim hodam. Pra heta paviedamlaje «Biełsat» sa spasyłkaj na źviestki Pamiežnaj achovy Polščy.

Prymusovaja departacyja zamiežnikaŭ z Polščy. Fota: Straż Graniczna / Ch

Usiaho za hod polskija ŭłady pryniali i realizavali bolš za 9,4 tysiačy rašeńniaŭ ab abaviazku zamiežnikaŭ pakinuć krainu. Častka ź ich była vykanana dobraachvotna, astatnija — u prymusovym paradku.

Najbolš takich pastanoŭ u 2025 hodzie tyčyłasia hramadzian Hruzii — zvyš 1,9 tysiačy, ź jakich kala 360 čałaviek byli departavanyja prymusova. Biełarusy zaniali druhoje miesca: amal 1,3 tysiačy pastanoŭ, prykładna 130 ź ich — z prymusovaj vysyłkaj, što składaje kala dziesiaci pracentaŭ. Treciaje miesca zaniali hramadzianie Ukrainy — bolš za 1,2 tysiačy rašeńniaŭ, pryčym pieravažnaja bolšaść ź ich była vykanana prymusova. Taksama časta pad abaviazak viartańnia traplali hramadzianie Małdovy.

Dla paraŭnańnia, u 2024 hodzie z Polščy vyjechali bolš za 8,5 tysiačy zamiežnikaŭ, i ŭ asnoŭnym heta adbyvałasia dobraachvotna. Biełarusaŭ tady było zafiksavana bolš za 1,3 tysiačy, adnak prymusovych vysyłak naličvałasia tolki 66. Takim čynam, choć ahulnaja kolkaść vysłanych biełarusaŭ krychu źmienšyłasia, prymusovych departacyj stała prykładna ŭdvaja bolš.

Na hetym fonie i ŭ susiedniaj Litvie hučać prapanovy ŭzmacnić mihracyjnuju palityku, kab zmahacca sa złoŭžyvańniami i padrobkaj dakumientaŭ. Niadaŭna pryznačanaja novaja kiraŭnica Departamienta mihracyi Litvy padkreśliła, što havorka idzie nie pra skaračeńnie kolkaści mihrantaŭ, a pra bolš žorstki kantrol za imihracyjnymi pracesami.

Kamientary da artykuła