Machlarka naduryła 29 čałaviek, dva hady pracujučy pad šyldaj turahienctva

Śledčy kamitet paviedamiŭ pra rasśledavańnie spravy ab bujnym machlarstvie, jakoje rabiłasia pad vyhladam turahienctva.

Žančyna, abjaŭlenaja ŭ vyšuk za bujnoje machlarstva. Fota: sk.gov.by

Pa materyjałach śledstva, z pačatku 2024 hoda 51‑hadovaja minčanka adkryła firmu i prapanoŭvała pasłuhi pa arhanizacyi padarožžaŭ. Na pieršy pohlad usio vyhladała zakonna: z klijentami zaklučalisia damovy, afarmlalisia zajaŭki ŭ turapierataraŭ, a hrošy za tury pastupali na raźlikovy rachunak kampanii. Adnak srodki vykarystoŭvalisia nie pa pryznačeńni.

Žančyna pieraličvała turapierataram tolki kala piataj častki ad koštu pajezdki. Z-za niapoŭnaj apłaty braniravańni paśla anulavalisia, a pieraličanyja sumy viartalisia nazad. Atrymanymi ad klijentaŭ hrašyma machlarka nie raźličvałasia z partniorami i nie viartała ich zakazčykam, a nakiroŭvała na arendu ofisa, zarobki supracoŭnikam, kamunalnyja i inšyja vydatki.

Praź niekatory čas ludzi pačali atrymlivać paviedamleńni pra skasavańnie turaŭ nibyta z-za finansavych pamyłak. Pradprymalnica prapanoŭvała im znoŭ apłacić pajezdku całkam, abiacajučy viarnuć hrošy paśla padarožža. Tyja, chto nie pahadziŭsia na takija ŭmovy, adnak, źviarnulisia ŭ milicyju.

Śledstva ŭstanaviła, što za dva hady žančyna padmanuła 29 žycharoŭ Minska i niezakonna zavałodała sumaj bolš za 250 tysiač rubloŭ. Zaviedziena kryminalnaja sprava pa artykule ab machlarstvie ŭ asabliva bujnym pamiery. Taksama praviarajecca mahčymy ŭdzieł žančyny ŭ inšych padobnych złačynstvach.

U Śledčym kamitecie nahadvajuć: pierad nabyćciom turystyčnych pasłuh varta praviarać reputacyju ahienctva, uvažliva čytać damovy, nie pieraličvać hrošy na asabistyja kartki, zachoŭvać usie dakumienty i z aściarohaj stavicca da zanadta tannych prapanoŭ.

Kamientary da artykuła