Sakretnaja zbroja. Jak ukrainski robat-kulamiotčyk strymlivaŭ rasijan šeść tydniaŭ
Na praciahu 45 dzion rasijskija vojski strymlivalisia na linii frontu dystancyjna kiravanaj zbrojaj pamieram nie bolš za hazonakasiłku.
Na adnym z učastkaŭ frontu dla adbićcia varožych atak Treci armiejski korpus USU vykarystaŭ sakretnuju zbroju — naziemnaha robata pamieram nie bolš za hazonakasiłku. Heta kompleks DevDroid TW 12.7, abstalavany kulamiotam M2 Browning, paviedamlaje The Telegraph.
Na ŭschodzie Ukrainy rasijskija padraździaleńni 45 dzion nie mahli prarvać učastak frontu, jaki, jak vyśvietliłasia paźniej, abaraniaŭ usiaho adzin dystancyjna kiravany robat. Hetaja mašyna akazałasia nastolki efiektyŭnaj, što praciŭnik navat nie zapadozryŭ adsutnaści žyvych sałdat na pazicyi.
Techničnyja mahčymaści
Robat DevDroid TW 12.7 abstalavany ciažkim kulamiotam M2 Browning kalibra 12,7 mm. Apieratar kompleksu moža znachodzicca na biaśpiečnaj adlehłaści — da 25 kiłamietraŭ, kirujučy mašynaj praz płanšet.
Dziakujučy ŭbudavanamu štučnamu intelektu, robat zdolny samastojna prakładać maršrut pa składanym reljefie, a balistyčny kalkulatar zabiaśpiečvaje vysokuju dakładnaść ahniu.
Kamandzir udarnaj roty robataŭ NC-13 Treciaha armiejskaha korpusa Mikałaj «Makar» Zinkievič raspavioŭ, što mašyna faktyčna zamianiła saboj padraździaleńnie z 3—6 vajskoŭcaŭ.
Asabliva važnuju rolu technika adyhrała padčas niepahadzi — u tuman, doždž i śnieh. Kali zvyčajnyja pavietranyja drony nie mahli pravodzić raźviedku, rasijskija hrupy sprabavali vykarystoŭvać nizkuju bačnaść dla praryvu, ale kožny raz traplali pad ščylny i trapny ahoń naziemnaha robata.
Uvieś hety čas rasijskaja raźviedka nie mahła vyznačyć, što suprać ich vajuje mašyna. Nie było zafiksavana nijakich pierachopaŭ radyjopieramoŭ, a sam robat ni razu nie trapiŭ pad udar.
Kožnyja dva dni apieratary na karotki čas advodzili dron z pazicyi dla techničnaha absłuhoŭvańnia, jakoje pravodziłasia za čatyry kiłamietry ad linii frontu. Za čatyry hadziny kamanda paśpiavała pačyścić zbroju, papoŭnić bojekamplekt i zaradzić akumulatary.
Hety vypadak nazyvajuć novaj staronkaj u historyi technałahičnych vojnaŭ. Ukrainskaje kamandavańnie padkreślivaje: hałoŭnaja pieravaha takich sistem — mahčymaść utrymlivać niebiaśpiečnyja pazicyi z nulavymi stratami siarod asabovaha składu. Pakul robat trymaŭ abaronu, sałdaty znachodzilisia ŭ biaśpiečnych schoviščach.
Niadaŭna dla vykarystańnia na pieradavoj byli ŭchvaleny i inšyja viersii bieśpiłotnika, u tym liku dźvie mašyny, abstalavanyja hranatamiotami.
«Popyt na hetyja sistemy vysoki, — skazaŭ Mikałaj «Makar» Zinkievič. — Robaty nie kravatočać».