Na vyjeździe ź Minska pabudujuć aŭtavakzał

Adna z samych zahružanych transpartnych arteryj Minska — Partyzanski praśpiekt. Tut sutykajucca intaresy dziasiatkaŭ tysiač aŭtamabilistaŭ i pasažyraŭ hramadskaha transpartu. Dla taho, kab vyjezd sa stalicy (u rajonie stancyi mietro «Mahiloŭskaja» i HC «Moma») staŭ bolš kamfortnym, horadabudaŭniki zadumali šerah pieraŭtvareńniaŭ. Tut chočuć pabudavać aŭtavakzał z hramadska-handlovym kompleksam i stvaryć bolš pryjaznaje asiarodździe dla piešachodaŭ i viełasipiedystaŭ. Akramia taho, pobač z praśpiektam vyraście jašče adzin zavod. U administracyi Zavodskaha rajona chutka pačniecca abmierkavańnie prajekta, piša Realt.by.

Administracyja Zavodskaha rajona Minska pravodzić hramadskaje abmierkavańnie horadabudaŭničaha prajekta detalovaha płanavańnia zony hramadskaj šmatfunkcyjanalnaj zabudovy ŭ rajonie Partyzanskaha praśpiekta i MKAD. Havorka idzie pra terytoryju płoščaj 37 hiektaraŭ.

Prajektavanaja terytoryja prymykaje adrazu da dźviuch bujnych mahistralaŭ — heta ŭłasna Partyzanski praśpiekt i MKAD. Heta vielmi zahružany ŭčastak. Štodnia mienavita praz hetyja «varoty» ŭ horad ujazdžaje da 60 tysiač aŭtamabilaŭ. Akramia taho, tut znachodzicca kancavaja stancyja čyrvonaj linii mietro — «Mahiloŭskaja», jakoj karystajucca žychary Anharskaj, Šabanoŭ, Sosnaŭ i ŭsiaho paŭdniova-ŭschodniaha pryharada stalicy.

Pry hetym na samim prajektavanym učastku žyłych damoŭ niama, tut pradstaŭlenaja tolki vulična-darožnaja sietka (jana zajmaje 34%), hramadskaja i vytvorčaja zabudova. Siarod bujnych abjektaŭ — HC «Moma», Pałac dziaciej i moładzi «Zołak», niekalki administracyjnych budynkaŭ, pratestanckaja carkva Viefil, dźvie AZS i aŭtamyjka.

Što płanujecca zrabić?

Dla stvareńnia zapaminalnaha architekturnaha abličča zabudovy ŭ hałaŭnoj častcy Partyzanskaha praśpiekta i bolš efiektyŭnaha vykarystańnia terytoryi prajektam prapanujucca nastupnyja pieraŭtvareńni.

Tak, na miescy aŭtastancyi «Aŭtazavodskaja» i častki aŭtazapraŭki «Biełarusnafta» horadabudaŭniki chočuć uźvieści administracyjna-handlovy kompleks z aŭtavakzałam i pierachoplivajučaj aŭtastajankaj (na płanie — № 11).

Adznačajecca, što novy šmatfunkcyjanalny hramadski centr nieabchodny dla kamfortnaha absłuhoŭvańnia tranzitnaha pasažyrskaha patoku. Taksama tut buduć stvoranyja bolš pryjaznyja ŭmovy dla piešachodaŭ i ravarystaŭ. U kalidorach najaŭnych vulic źjavicca rovarnaja i piešachodnaja infrastruktura, jakoj nie chapała, a prypynki hramadskaha transpartu i transpartna-pierasadačnyja vuzły dla zručnaści haradžan buduć raźmiaščacca na adlehłaści nie bolš za 200 mietraŭ adzin ad adnaho.

Akramia taho, prajekciroŭščyki majuć namier bolš efiektyŭna vykarystoŭvać pustyja terytoryi ŭ rajonie vulicy Sacyjalistyčnaj — pobač z najaŭnymi zavodami MAZ i MZKT. Tut zareziervujuć učastak pad budaŭnictva novaha vytvorčaha pradpryjemstva z bazavaj sanitarna-achoŭnaj zonaj da 50 mietraŭ (na płanie — № 10). Tut ža ŭ budučyni projdzie novaja vulica miascovaha značeńnia — Prajektavanaja № 1.

Materyjały prajekta ŭžo vykładzienyja na sajcie administracyi Zavodskaha rajona. Hramadskaje abmierkavańnie prajekta budzie prachodzić z 2 pa 16 lutaha.

Zaŭvahi i prapanovy z paznakaj «hramadskaje abmierkavańnie» prymajucca ŭ terminy praviadzieńnia abmierkavańnia pa adrasie: 220026, Minsk, vuł. Žyłunoviča, 17, abo pa elektronnaj pošcie: zav.arhitektor@minsk.gov.by. Vyniki padviaduć na pasiadžeńni architekturna-horadabudaŭničaj Rady pry hałoŭnym architektary horada Minska.

Kamientary da artykuła