Jeŭrasajuz źbirajecca ŭvieści sankcyi suprać Kyrhyzstana za dapamohu Rasii
Jeŭrapiejski sajuz razhladaje mahčymaść upieršyniu ŭvieści sankcyi suprać Kyrhyzstana za sadziejničańnie Rasii ŭ abychodzie abmiežavańniaŭ. Pavodle źviestak Bloomberg, hetyja miery abmiarkoŭvajucca ŭ miežach padrychtoŭki 20‑ha pakieta sankcyj, źviazanych z vajnoj va Ukrainie.
Zdymak ilustracyjny. Fota: André Ballin/picture alliance via Getty Images
Krynicy ahienctva paviedamlajuć, što ŭ dačynieńni da Kyrhyzstana mohuć užyć śpiecyjalny miechanizm pakarańnia za abychod sankcyj. U pryvatnaści, płanujecca zabaranić pastaŭki ŭ krainu stankoŭ i radyjoelektronnaha abstalavańnia.
Paśla pačatku vajny Kyrhyzstan pieratvaryŭsia ŭ važny handlovy vuzieł, praź jaki ŭ Rasiju traplali jeŭrapiejskija tavary, što padpadajuć pad sankcyi. Analityki Brookings Institution adznačajuć rezki rost ekspartu z krain ES u Kyrhyzstan: pastaŭki z Estonii pavialičylisia ŭ dziasiatki razoŭ, ź Finlandyi, Polščy, Hrecyi i inšych dziaržaŭ — na tysiačy pracentaŭ. U vyniku značnaja častka hetaha ekspartu faktyčna akazvałasia na rasijskim rynku.
Akramia taho, ŭ Kyrhyzstanie pačała pracavać kryptabirža Grinex, dzie vykarystoŭvajecca tolki stejbłkojn A7A5, pryviazany da rasijskaha rubla. Hety instrumient, zapuščany z udziełam rasijskaha abaronnaha banka i biznesmienaŭ, staŭ srodkam mižnarodnych raźlikaŭ va ŭmovach sankcyj. Da pačatku 2026 hoda abjom apieracyj ź im dasiahnuŭ kala 100 miljardaŭ dalaraŭ.
U novym sankcyjnym pakiecie ES taksama razhladaje dadatkovyja abmiežavańni suprać rasijskich bankaŭ, naftavych kampanij, kryptaservisaŭ i finansavych struktur u trecich krainach, jakija dapamahajuć abychodzić užo najaŭnyja sankcyi.
Akramia hetaha, u Brusieli abmiarkoŭvajecca ideja poŭnaj zabarony marskich pieravozak rasijskaj nafty. Takaja miera pavinna zamianić dziejny miechanizm «stoli cen», jaki dazvalaje transpartavańnie i strachavańnie nafty z Rasii pry ŭmovie, što jaje košt nižejšy za ŭstalavany ŭzrovień. Ź lutaha hety limit pavinien składać krychu bolš za 44 dalary za baral.
Čytajcie taksama:
Jak «Intehrał» abychodzić sankcyi i dapamahaje Rasii ŭ vajnie
Padsankcyjnyja aŭto i hruzaviki ŭsio adno traplajuć u Biełaruś i Rasiju, ale jość niatanny niuans
«Hrodna Azot» prydumała, jak pastaŭlać karbamid na rynki Čechii i Polščy ŭ abychod sankcyj