«U hetaha pavinna być niejkaje druhoje dno». Čempijon Polščy pa boksie raptoŭna źjechaŭ u Biełaruś, kinuŭšy navat svaje ŭznaharody

Uładalnik tytuła mižnarodnaha čempijona Polščy pa boksie Jaŭhien Makarčuk, 32‑hadovy ŭradženiec Lidy, jaki jašče niadaŭna zajaŭlaŭ pra žadańnie vystupać pad polskim ściaham, niečakana viarnuŭsia ŭ Biełaruś. Byłyja zastupniki spartsmiena padazrajuć, što za jahonym bieśpieraškodnym viartańniem i praciaham karjery moža stajać supracoŭnictva ź biełaruskimi siłavymi strukturami, piša «Lusterka» na padstavie paviedamleńniaŭ polskaj presy.

Jaŭhien Makarčuk. Fota: Justyna Skubis

Makarčuk pierajechaŭ u Polšču vosieńniu 2022 hoda i nieŭzabavie staŭ vystupać na rynhu ŭ hetaj krainie. Jon vučyŭ polskuju movu, mieŭ namier atrymać hramadzianstva.

«U majoj siamji nas z pakaleńnia ŭ pakaleńnie vychoŭvali ŭ duchu polskaści. Dahetul my ź blizkimi padtrymlivajem polskija tradycyi i zvyčai. […] Mnie padabajecca ŭ Polščy, ja adčuvaju siabie tut jak doma. Ja palak. Maja mara — zavajavać pojas čempijona śvietu dla Polščy», — kazaŭ baksior u intervju jašče vosieńniu 2024 hoda.

Adnak, jak vyśvietliłasia, nieŭzabavie paśla hetych słoŭ pavodziny spartsmiena źmianilisia, a zatym jon i zusim źnik. Dzianis Zvonik, kiraŭnik fondu, jaki dapamahaŭ Makarčuku ź pierajezdam i hrašyma, nie chavaje emocyj:

«My zabiaśpiečyli Jaŭhienu finansavańnie, žyllo, charčavańnie, ale, na žal, jak bačna, jon hetaha nie caniŭ. Jon źjechaŭ, pakinuŭšy paśla siabie finansavyja abaviazacielstvy nie tolki pierad mnoj, ale i pierad trenierami i mieniedžaram».

Źniknieńnie było raptoŭnym, baksior nikoha nie prainfarmavaŭ pra adjezd.

«Pry kancy śniežnia 2024 hoda ź Jaŭhienam užo nie było nijakaj suviazi. … Kali jon źnik biez słova, ja byŭ šakavany i adčuvaŭ ahidu. My ž u rešcie rešt stolki siłaŭ na jaho patracili. Heta była vielizarnaja praca, ale, na žal, takoje rašeńnie jon pryniaŭ».

Mieniedžar Viktar Materan dadaŭ detal, jakaja ździviła kamandu bolš za ŭsio: jon pakinuŭ usie svaje rečy, navat samaje kaštoŭnaje dla luboha spartoŭca.

«Heta było dla nas vielmi dziŭna, bo chto pierajazdžaje, toj chutčej zabiraje z saboj svaju majomaść, praŭda? Jon pakinuŭ navat svaje pajasy, jakija zavajavaŭ na rynhu!» — aburyŭsia Materan.

Pavodle słoŭ pramoŭtara Maryjuša Hraboŭskaha, Makarčuk pieršapačatkova, kali pryjechaŭ u Polšču, kazaŭ, što nie moža viarnucca ŭ rodnuju krainu.

«Kali jon sapraŭdy viarnuŭsia ŭ Biełaruś, u hetaha pavinna być niejkaje druhoje dno», — adznačyŭ pramoŭtar.

Pry hetym nieŭzabavie paśla «źniknieńnia» paćvierdziłasia, što Makarčuk znachodzicca ŭ Biełarusi, na voli, i navat padarožničaje. U jahonych sacsietkach źjavilisia videa trenirovak ź Minska, kadry z Dubaja, bo jon jeździŭ u AAE, a ŭ kancy 2025 hoda navat pravioŭ boj u Hiermanii. Takaja svaboda pieramiaščeńnia vyklikała padazreńni ŭ Artura Kondrata, kiraŭnika arhanizacyi, jakaja padtrymlivaje palakaŭ u krainach na ŭschod ad Polščy.

«Dastatkova ŭsiaho troch miesiacaŭ pa-za krainaj, kab pry sprobie ŭjezdu ŭ Biełaruś trapić na šmatahadzinny dopyt. Praviarajecca ŭsio: telefony, kantakty, fota, sacsietki. Lida — maleńki horad, a pra pośpiechi Makarčuka pisaŭ, naprykład, Sajuz palakaŭ Biełarusi. Jon tam vielmi viadomy. Niama mahčymaści, kab biełaruskija słužby nie ŭziali jaho na dopyt».

Na jaho dumku, biez ździełki ź siłavikami dalejšaja karjera baksiora była b niemahčymaja:

«Kali b jon nie pajšoŭ u niejkim abjomie na supracoŭnictva, to, chutčej za ŭsio, nie vyjechaŭ by ŭ Dubaj, a paźniej u Hiermaniju. … Toj fakt, što Makarčuk pradstaŭlaŭ Polšču, nie mahli jamu voś tak prosta prabačyć. Raz jon pieramiaščajecca pa śviecie, vysokaja imaviernaść taho, što jon moh pajści na supracoŭnictva, bo ŭ advarotnym vypadku ŭ jaho mahli b być surjoznyja prablemy z zakonam», — ličyć Artur Kondrat.

Polski sajuz boksu na zapyty polskich žurnalistaŭ i zvarot asacyjacyi nie adkazaŭ, jak i sam spartoviec.

Kamientary da artykuła