Abaranić Izrail i arabskich sajuźnikaŭ. ZŠA nie ŭdarać pa Iranie, pakul nie załatajuć dzirki ŭ SPA
Abiacanaja Donaldam Trampam «armada» ŭžo prybyła ŭ rehijon: avijanosnaja hrupa USS Abraham Lincoln i najnoŭšyja źniščalniki F-35 zaniali pazicyi. Adnak amierykanskija ŭdary pa Iranie pakul nie pačalisia. Jak vyśvietliła Wall Street Journal, Pientahon baicca mahutnaha adkazu Tehierana i sprabuje terminova ŭzmacnić abaronu svaich baz i sajuźnikaŭ sistemami Patriot i Thaad.
Thaad u dziejańni. Fota: Wikimedia Commons
Čakańnie «armady»
Ściahvańnie amierykanskich sił na Blizki Uschod idzie poŭnym chodam. Da avijanosca «Linkaln» dałučylisia źniščalniki F-35 Nacyjanalnaj hvardyi Viermonta — tyja samyja, što ŭ studzieni ŭdzielničali ŭ zachopie Nikałasa Madura. U rehijonie ŭžo znachodziacca vosiem eśmincaŭ z kiravanymi rakietami, zdolnymi źbivać pavietranyja celi.
Adnak aficyjnyja asoby ZŠA zajaŭlajuć: choć kropkavyja ŭdary pa Iranie možna nanieści choć siońnia, maštabnaja kampanija, jakuju patrabuje Tramp, niemahčymaja biez «parasona» supraćpavietranaj abarony. Pientahon pierakidvaje dadatkovyja batarei Thaad i Patriot u Iardaniju, Kuviejt, Bachrejn, Saudaŭskuju Araviju i Katar.
Urok «Paŭnočnaha mołata»
Aściarožnaść Pientahona maje pad saboj padstavy. U červieni 2026 hoda padčas apieracyi «Paŭnočny mołat» (Midnight Hammer) amierykanskija bambaviki B-2 i submaryny atakavali try iranskija jadziernyja abjekty. Reakcyja Tehierana była imhniennaj: užo na nastupny dzień 14 rakiet palacieli na avijabazu Al-Udejd u Katary, dzie mieścicca kamandny centr ZŠA.
Choć bolšaść rakiet źbili, adna ŭsio ž paceliła ŭ bazu. Kali ciapier ZŠA pačnuć «vialikuju hulniu» z metaj zrynuć režym abo spynić uzbahačeńnie ŭranu, iranski adkaz budzie ŭ razy mahutniejšym.
Tehieran moža zadziejničać uvieś svoj arsienał balistyčnych rakiet, a taksama proksi-siły: chusitaŭ u Jemienie, šyickija milicyi ŭ Iraku i ekstremistaŭ u Siryi.
Arabski niejtralitet
Situacyju ŭskładniaje pazicyja arabskich manarchij. Saudaŭskaja Aravija i AAE ŭžo zajavili, što nie dazvolać vykarystoŭvać svaju pavietranuju prastoru i terytoryju dla napadaŭ na Iran. Heta sproba izalavać siabie ad iranskaj pomsty.
Pry hetym sami araby taksama lichamankava ŭmacoŭvajuć svaju abaronu: Saudaŭskaja Aravija ŭžo zamoviła siem batarej Thaad, častka jakich pačała pastupać na ŭzbrajeńnie.
Rakietny hoład
Hałoŭnaja prablema ZŠA — deficyt snaradaŭ-pierachopnikaŭ. Letam padčas adbićcia iranskich atak Izrail i ZŠA vydatkavali kala 150 rakiet Thaad — heta čverć ad usich zapasaŭ, jakija Pientahon kali-niebudź kuplaŭ.
Kab vyrašyć prablemu, Pientahon i kampanija Lockheed Martin padpisali pahadnieńnie ab pavieličeńni vytvorčaści pierachopnikaŭ u čatyry razy — z 96 da 400 štuk na hod. Ale hetaja damova nie dapamoža ŭ najbližejšyja tydni, kali kanflikt uspychnie na ŭsie siły.
«Sistemy SPA — heta kaniečny resurs, i jany zaraz raściahnutyja da miažy», — kažuć analityki. Raźmiaščeńnie Thaad — heta vielmi mocny sihnał, bo ŭ ZŠA ŭsiaho siem takich apieratyŭnych batarej. Kali ich pierakidvajuć na Blizki Uschod, značyć, imaviernaść sapraŭdnaj vajny stanovicca nadzvyčaj vysokaj.