Francyja pamianiała praviły vydačy šenhienskich viz dla biełarusaŭ
Francyja źmianiła i spraściła praceduru atrymańnia šenhienskaj vizy dla hramadzian Biełarusi. Jak paviedamiła francuzskaje pasolstva, z 2 lutaha 2026 hoda zapis na padaču vizavych zajaŭ robicca praź vizavy centr TLScontact, jakomu pieradali adpaviednyja funkcyi.
Pasolstva Francyi ŭ Minsku. Fota: Wikimedia Commons
Z hetaha ž dnia pačaŭ pracavać i sajt TLScontact. Ciapier hramadzianam Biełarusi i inšaziemcam, jakija žyvuć u krainie, nieabchodna stvaryć ulikovy zapis na sajcie vizavaha centra i zapoŭnić anłajn-ankietu dla padačy dakumientaŭ.
Adno z hałoŭnych novaŭviadzieńniaŭ — mahčymaść padavać dakumienty na francuzskuju turystyčnuju vizu indyvidualna. Raniej takuju vizu možna było atrymać tolki ŭ składzie arhanizavanaha tura. Pry najaŭnaści volnych miescaŭ zajaŭnikam buduć pryznačać datu padačy dakumientaŭ u pasolstvie Francyi.
Taksama ŭ dyppradstaŭnictvie zajavili pra spraščeńnie vizavaj pracedury dla asobnych katehoryj zajaŭnikaŭ, u tym liku dla siamiejnikaŭ hramadzian Jeŭrapiejskaha sajuza.
Turystyčnyja hrupy, jakija pradstaŭlajucca turystyčnymi ahienctvami, budzie supravadžać TLScontact: jon budzie źviazvacca ź imi dla pryznačeńnia daty pryjomu paśla ŭchvaleńnia zajaŭ konsulskimi słužbami i pry najaŭnaści volnych miescaŭ.
Pry hetym usie pryjomy dakumientaŭ, jak i raniej, buduć adbyvacca ŭ pasolstvie Francyi ŭ Minsku. Mienavita pasolstva zastajecca adzinym orhanam, jaki prymaje rašeńni ab usich vizavych zajavach i katehoryjach.
Čytajcie taksama:
«Paŭhoda čakańnia, minus $1200 — i nijakaj vizy». Jak biełarusy zaraz adkryvajuć «šenhien»
Kolki šenhienskich viz atrymali biełarusy ŭ 2024 hodzie i jakija krainy ich čaściej vydajuć?
Ekśpiertka padzialiłasia łajfchakam, jak atrymać šenhien chutčej i na bolš praciahły termin