Izrailskaja avijakampanija Arkia pakul nie zapuściła pramyja rejsy ź Minska ŭ Tel-Aviŭ
Izrailskaja avijakampanija Arkia ŭ lutym hetaha hoda płanavała zapuścić pramyja rejsy ź Minska ŭ Tel-Aviŭ. Adnak pieršy palot dahetul tak i nie adbyŭsia, a na sajcie pieravozčyka niemahčyma znajści kvitki, źviarnuŭ uvahu Office Life.
Arkia
Pramoje avijazłučeńnie pamiž Izrailem i Biełaruśsiu było prypyniena z 2022 hoda. U pačatku śniežnia 2025 hoda było anansavana, što rejsy avijakampanii Arkia ź Minska ŭ Tel-Aviŭ źjaviacca ź lutaha 2026 hoda. Jak zajaŭlała kamiercyjnaja dyrektarka Arkia Sapir Ifarhan, heta adpaviadaje płanam kampanii pa pašyreńni sietki palotaŭ, a taksama adlustroŭvaje rost cikavaści pasažyraŭ da pramych pieralotaŭ va Uschodniuju Jeŭropu.
Paloty płanavałasia vykonvać dvojčy na tydzień — pa paniadziełkach i piatnicach. Jany taksama paznačanyja ŭ siezonnym raskładzie Minskaha aeraporta: z 6 lutaha pa 27 sakavika.
Adnak pakul na tabło rejsaŭ ich niama, a nabyć kvitki z Tel-Aviva ŭ Minsk i nazad na sajcie pieravozčyka niemahčyma.
Jak paćvierdzili Office Life ŭ Nacyjanalnym aeraporcie Minsk, u lutym u raskładzie rejsaŭ Arkia niama. Ci źjaviacca jany ŭ sakaviku, pakul taksama nieviadoma.
Raniej ajčynnaja avijakampanija Belavia paśla amal čatyrochhadovaha pierapynku adnaviła z 8 studzienia rehularnyja rejsy ź Minska ŭ Tel-Aviŭ — pa čaćviarhach i niadzielach.