U nastupnym hodzie źbirajucca zdać novy archiŭny kompleks u Minsku
Ministr justycyi Jaŭhien Kavalenka paviedamiŭ, što novy archiŭny kompleks, jaki ciapier budujecca ŭ Minsku, stanie sučasnym archiŭnym chabam. U im budzie skancentravanaja praca pa ŭsich asnoŭnych napramkach archiŭnaj spravy — ad zachavańnia dakumientaŭ da ich ličbavaj apracoŭki, navukovych daśledavańniaŭ i papularyzacyi archiŭnych materyjałaŭ, piša BiełTA.
Zdymak ilustracyjny. Fota: BiełTA
Zhodna z prajektnaj dakumientacyjaj, budaŭnictva pavinna być zakončana ŭ 2027 hodzie, adnak ułady imknucca zrabić usio mahčymaje, kab archiŭny kompleks pačaŭ pracavać raniej.
Novy kompleks budzie nie prosta miescam zachavańnia archivaŭ. U im taksama raźmieściacca arhanizacyi archiŭnaj haliny, jakija buduć zajmacca raźvićciom ličbavych technałohij, navukovaj dziejnaściu i pašyreńniem dostupu hramadstva da archiŭnych materyjałaŭ.
Pavodle słoŭ Jaŭhiena Kavalenki, archiŭnaje zachoŭvańnie — heta vysokatechnałahičny praces, jaki patrabuje śpiecyjalnaha abstalavańnia dla padtrymańnia patrebnaha tempieraturnaha režymu, harantavańnia pažarnaj biaśpieki i ličbavizacyi dakumientaŭ. Tamu razam z budaŭnictvam budynka paralelna ŭkaraniajucca sučasnyja technałahičnyja rašeńni.
Ministr taksama adznačyŭ, što dziaržava aktyŭna ŭkładvaje srodki ŭ raźvićcio materyjalna-techničnaj bazy archiŭnych ustanoŭ. U 2024—2025 hadach u Homieli, Hrodnie, Mahilovie i Viciebsku byli adkrytyja čatyry novyja archivaschoviščy. Akramia taho, praciahvajecca rekanstrukcyja budynka Biełaruskaha dziaržaŭnaha archiva kinafotafonadakumientaŭ u Dziaržynsku, jakuju płanujuć zaviaršyć da 3 lipienia.
Dla pavyšeńnia efiektyŭnaści pracy archivaŭ taksama zakuplajecca sučasnaje abstalavańnie, u tym liku skaniery, što dazvalaje chutčej abličboŭvać dakumienty i zabiaśpiečvać ich nadziejnaje ličbavaje zachoŭvańnie.
Čytajcie taksama:
U Polšču z Hiermanii viarnuŭsia vyviezieny nacystami archiŭ ź piačatkami Vitaŭta i Jahajły