U Varšavie za pracu na rasijskuju raźviedku zatrymali supracoŭnika Minabarony Polščy
U Varšavie zatrymali supracoŭnika Ministerstva abarony Polščy, jakoha padazrajuć u špijanažy. Pra heta 3 lutaha paviedamiła samo viedamstva. Zatrymańnie adbyłosia niepasredna ŭ budynku ministerstva.
Fota ilustracyjnaje
Pavodle aficyjnaj infarmacyi, mužčynu padazrajuć u supracoŭnictvie z zamiežnaj raźviedkaj, adnak inšych detalaŭ u Minabarony nie raskryli.
U toj ža čas polskaje vydańnie Onet.pl sa spasyłkaj na svaju krynicu ŭdakładniła, što havorka idzie pra 60‑hadovaha mužčynu, jaki bolš za 30 hadoŭ pracavaŭ u sistemie Ministerstva abarony i byŭ cyvilnym słužboŭcam. Śledstva ličyć, što jon padtrymlivaŭ kantakty z pradstaŭnikami rasijskaj i biełaruskaj śpiecsłužbaŭ i navat sustrakaŭsia ź imi asabista.
Pavodle infarmacyi Onet, jašče ŭ 2021 hodzie Słužba vajskovaj kontrraźviedki Polščy pravodziła pravierku hetaha supracoŭnika, ale tady ničoha padazronaha vyjaŭlena nie było.
Na pres-kanfierencyi 4 lutaha pres-sakratar ministra — kaardynatara polskich śpiecsłužbaŭ Jacak Dabžyński paćvierdziŭ, što zatrymany sapraŭdy byŭ cyvilnaj asobaj i šmat hadoŭ pracavaŭ u strukturach Minabarony. Jon taksama adznačyŭ, što mužčyna doŭhi čas znachodziŭsia pad apieratyŭnym nahladam kontrraźviedki, ale nie zajmaŭ vysokuju pasadu.
Pavodle Onet, supracoŭniku ŭžo vystavili abvinavačańni. Jaho pieradali ŭ rasparadžeńnie vajskovaj prakuratury, a ŭ vypadku pryznańnia viny za pracu na karyść zamiežnaj raźviedki jamu pahražaje praciahły termin pazbaŭleńnia voli.