Lidary Łatvii i Estonii zaklikali rychtavacca da pramych pieramoŭ z Rasijaj

Premjer-ministarka Łatvii Evika Silinia i prezident Estonii Ałar Karys zaklikajuć pryznačyć śpiecyjalnaha jeŭrapiejskaha pasłańnika dla adnaŭleńnia dypłamatyčnych kantaktaŭ z Maskvoj. Na ich dumku, Jeŭrapiejski sajuz pavinien mieć mahčymaść vieści pieramovy z Rasijaj u kantekście mirnaha rehulavańnia vajny va Ukrainie i mieć svoj hołas pobač z Vašynhtonam i Kijevam, piša Euronews.

Evika Silinia i Ałar Karys. Fota: Associated Press

Raniej prezident Francyi Emanuel Makron adznačaŭ, što praca pa pryznačeńni śpiecapasłańnika ŭžo pačałasia na «techničnym uzroŭni», i hetuju ideju padtrymała premjerka Italii Džordža Miełoni. Ideja ŭźnikła jašče letam minułaha hoda, ale tady bolšaść jeŭrapiejskich lidaraŭ paličyli jaje niedarečnaj.

Evika Silinia padkreśliła, što pieramovy z Rasijaj pavinny adbyvacca tolki paśla kansultacyj z Ukrainaj i što abrany pasłańnik pavinien być kansensusnaj fihuraj. Jana nazvała mahčymymi pradstaŭnikami ad Jeŭropy lidaraŭ Francyi, Hiermanii, Polščy i Vialikabrytanii, ale adznačyła, što kančatkovy vybar jašče treba zrabić.

Prezident Estonii Karys nie nazvaŭ kankretnych imionaŭ, ale adznačyŭ, što pasłańnik pavinien być pradstaŭnikom bujnoj jeŭrapiejskaj dziaržavy i mieć aŭtarytet u abodvuch bakoŭ. Jon taksama padkreśliŭ, što ES pavinien aktyŭna ŭdzielničać u dyskusijach i mieć prava hołasu, bo jeŭrapiejskija krainy padtrymlivajuć Ukrainu ŭžo niekalki hadoŭ.

U toj ža čas uradavyja struktury Estonii papiaredzili, što adnaŭlać adnosiny z Rasijaj nielha, pakul Maskva nie źmienić svaich dziejańniaŭ i metaŭ ahresii. Hiermanija taksama vystupaje suprać pramych pieramoŭ, spasyłajučysia na «maksimalisckija patrabavańni» Pucina i praciahłyja abstreły ŭkrainskich haradoŭ.

Pres-sakratar Kramla Dźmitryj Piaskoŭ paćvierdziŭ, što Rasija i Francyja ŭzajemadziejničajuć na pracoŭnym uzroŭni, ale asablivych vynikaŭ pakul niama, jak i kantaktaŭ na vyšejšym uzroŭni.

Kamientary da artykuła