Kaniec epochi całkam biaspłatnaha ŠI? U ChatGPT źjaŭlajecca rekłama, i voś jak jana budzie vyhladać

OpenAI pierajšła ad słoŭ da spravy ŭ pytańni manietyzacyi samaha papularnaha čat-bota śvietu. Karystalniki biaspłatnych viersij i samych tannych taryfaŭ nieŭzabavie pabačać baniery ŭ svaich čatach — spačatku ŭ ZŠA, a paśla i ŭ inšych krainach. Raźbirajemsia, što heta źmienić.

Fota: Jernej Furman/flickr.com/cc-by-2.0

Zhodna z danymi, atrymanymi z beta-viersij prahramy dla Android i veb-interfiejsu, pry pieršym zapusku karystalnikaŭ budzie sustrakać poŭnaekrannaje paviedamleńnie pra źmieny. Ahlad rekłamy zrabiŭ tech-błohier Tibor Biaho u tvitary.

Papiaredžańnie pra źjaŭleńnie rekłamy ŭ ChatGPT. Fota: btibor91/twitter.com

Rekłamnyja błoki buduć źjaŭlacca nie ŭnutry tekstu adkazaŭ robata, što mahło b zabłytać karystalnika, a raźmiaščajucca ŭ asobnych zonach i paznačajucca teham «Sponsored».

Rekłama znajchodzicca ŭ poli Sponsored. Fota: btibor91/twitter.com

Techničny bok pytańnia vyklikaje najbolš dyskusij: ałharytm padboru rekłamy budzie abapiracca jak na temu vašaj biahučaj razmovy, tak i na historyju papiarednich čataŭ. OpenAI zapeŭnivajuć, što rekłamadaŭcy nie atrymajuć pramoha dostupu da vašych dyjałohaŭ, im budzie dastupnaja tolki abahulnienaja statystyka prahladaŭ i klikaŭ.

Dla tych, chto turbujecca pra pryvatnaść, praduhledžanaja staronka naład «Ads control», dzie možna adklučyć piersanalizacyju na asnovie pamiaci i historyi, chacia rekłama na asnovie kantekstu biahučaj hutarki ŭsio roŭna zastaniecca.

Punkt mieniu Ads Control. Fota: btibor91/twitter.com

Z punktu hledžańnia karystalnickaha dośviedu pieršaja realizacyja vyhladaje davoli strymanaj. Karystalniki taksama atrymajuć mahčymaść chavać kankretnyja abjavy praź mieniu i navat spytać ChatGPT pra źmiest rekłamy, kali im spatrebiacca detali bieź pierachodu pa spasyłcy.

Zapyt da ChatGPT pra rekłamu. Fota: btibor91/twitter.com

Uviadzieńnie rekłamy ŭžo spravakavała vostruju reakcyju kankurentaŭ. Kampanija Anthropic, stvaralnik čat-bota Claude, navat zapuściła rekłamnuju kampaniju, dzie vyśmiejvaje patencyjnuju nazojlivaść rekłamy ŭ AI-pamočnikach.

Heta vyśmiejvaje jašče i źmienu rytoryki kiraŭnika OpenAI Sema Altmana. Raniej jon vykazvaŭsia pra rekłamnuju madel niehatyŭna, a ciapier nazyvaje jaje sposabam zachavać biaspłatny dostup dla miljardaŭ ludziej.

Pakul niezrazumieła, ci zastaniecca rekłama takoj ža nienaviaźlivaj u budučyni. Historyja technałahičnych hihantaŭ pakazvaje, što rekłamny cisk z časam zvyčajna tolki ŭzmacniajecca.

Kamientary da artykuła