«Pieršy raz čuju». Zialenski prakamientavaŭ infarmacyju, što nibyta abvieścić vybary 24 lutaha

Brytanskaje vydańnie Financial Times paviedamiła, što va Ukrainie nibyta pačali rychtavacca da praviadzieńnia prezidenckich vybaraŭ i refierendumu adnosna mirnaj damovy z Rasijaj. Pavodle źviestak haziety, abviaščeńnie vybaraŭ mahło b adbycca 24 lutaha — u hadavinu pačatku poŭnamaštabnaha ŭvarvańnia. Adnak u kamandzie prezidenta Ukrainy zajavili Ukrainskaj słužbie Bi-bi-si, što pakul u krainie niama harantyj biaśpieki, nijakich abviaščeńniaŭ pra vybary nie budzie.

Uładzimir Zialenski. Fota: UNIAN

Uviečary heta asabista paćvierdziŭ i Uładzimir Zialenski.

«Pieršy raz čuju pra heta. Ranicaj pračytaŭ u FT, ciapier čuju ad vas. Da vybaraŭ my pryjdziom tady, kali buduć harantyi biaśpieki. Ja ŭžo kazaŭ: budzie spynieńnie ahniu — buduć vybary. Heta pytańnie biaśpieki», — adznačyŭ prezident Ukrainy, adkazvajučy na pytańni žurnalistaŭ u čacie Ofisa prezidenta.

Jon taksama padkreśliŭ, što nikoli nie staŭ by abviaščać vybary 24 lutaha, bo heta vielmi trahičnaja i simvaličnaja data dla krainy: čatyry hady vajny i vialikija čałaviečyja straty.

Pavodle infarmacyi Financial Times, administracyja Donalda Trampa nibyta zaklikaje Kijeŭ pravieści vybary i refierendum da 15 maja, inakš Ukraina moža stracić prapanavanyja ZŠA harantyi biaśpieki. Vydańnie spasyłajecca na ananimnyja ŭkrainskija i zachodnija krynicy.

U Kramli taksama adreahavali na publikacyju. Pres-sakratar prezidenta Rasii Dźmitryj Piaskoŭ zajaviŭ, što pakul rana rabić vysnovy i varta aryjentavacca na aficyjnyja zajavy, a nie na infarmacyju sa spasyłkaj na nienazvanyja krynicy.

Financial Times adznačaje, što praviadzieńnie vybaraŭ stała b palityčnym pavarotam dla Zialenskaha, jaki raniej zajaŭlaŭ, što hałasavańnie niemahčymaje padčas vajennaha stanovišča, kali častka terytoryi akupavanaja, a miljony hramadzian vymušanyja pakinuć svaje damy.

Pavodle ŚMI, pytańnie vybaraŭ i mirnych damoŭlenaściaŭ zaležyć ad šerahu faktaraŭ, u tym liku ad mahčymych pieramoŭ z Rasijaj. Sam Zialenski raniej padkreślivaŭ, što Ukraina nie hatovaja iści na terytaryjalnyja sastupki i «budzie stajać tam, dzie staić».

Kamientary da artykuła