«Nie mieŭ racyi». Minski majstar, jaki źniaŭ rolik pra kiepski servis biełaruskaha noŭtbuka, zapisaŭ «pakajannaje» videa
Raniej majstar pa ramoncie techniki narakaŭ na prablemu z zapčastkami dla biełaruskaha «ašbuka» i adznačyŭ dziŭnaje jaho padabienstva z kitajskim. Ciapier ža majstar kaža: «Nie razabraŭsia». Jaho novy dopis zaŭvažyŭ kanał «Vitiebsk, ja hulaju!».
«Užo niemahčyma maŭčać pra hetyja «ašbuki», nibyta biełaruskija. Heta prosta pipiec. Zapčastak niama ad słova zusim. Jak jany zakuplali ŭ Kitai?» — biedavaŭ minski majstar.
Na jaho dumku, biełaruski noŭtbuk — heta kitajski Spirit. Ale toje nie hałoŭnaje.
«Pytańnie voś u čym: ładna skrali «kitajca», ale zaviazicie vy kamplektujučyja, zaviazicie kłavijatury, zaviazicie akumulatary. Akumulataraŭ u aficyjałaŭ niama. Kłavijatury mahčymyja pad zamovu — treba telefanavać na zavod, miesiacami ciahnuć čas, «maroziać» — taksama niama», — kazaŭ jon.
Ciapier minski majstar zapisaŭ novaje videa, u jakim śćviardžaje, što nie mieŭ racyi i nie va ŭsim razabraŭsia.
Pavodle jaho słoŭ, servisnaje (harantyjnaje i paślaharantyjnaje) absłuhoŭvańnie hetych noŭtbukaŭ pravodzicca ŭ Biełarusi na vysokim uzroŭni — zapčastki možna zakazać niadoraha. A papiaredni rolik na hetu temu jon užo vydaliŭ i vykazaŭ škadavańnie nakont taho videa.
U kamientaryjach žanravyja asablivaści novaha videa hledačy nazvali «pakajannymi».