Vienhryja zabłakavała vydzialeńnie Ukrainie 90 miljardaŭ kredytu ES

Vydańnie Financial Times paviedamlaje, što Vienhryja zabłakavała rašeńnie ab vydzialeńni Jeŭrasajuzam Ukrainie kredytu ŭ pamiery 90 miljardaŭ jeŭra.

Premjer-ministr Vienhryi Viktar Orban. Fota: AP

Pavodle infarmacyi haziety sa spasyłkaj na krynicy, 20 lutaha pasoł Vienhryi pry ES zajaviŭ, što Budapiešt vystupaje suprać vypusku Jeŭrapiejskim Sajuzam daŭhavych abaviazacielstvaŭ, harantavanych biudžetam ES, dla finansavańnia kredytu Ukrainie. Dla pryniaćcia takoha rašeńnia nieabchodnaja adnahałosnaja padtrymka ŭsich 27 krain — členaŭ ES.

Lidary dziaržaŭ Jeŭrasajuza ŭzhadnili vydzialeńnie kredytu jašče ŭ śniežni, kab dapamahčy Ukrainie, jakaja ŭ krasaviku moža sutyknucca z deficytam biudžetu. Razam z tym Vienhryja, Słavakija i Čechija pahadžalisia na padtrymku tolki pry ŭmovie, što jany nie buduć nieści finansavuju adkaznaść za pahašeńnie pazyki.

Jak adznačaje vydańnie, Jeŭrakamisii nieabchodna atrymać padtrymku ŭsich krain ES, kab vykarystać biudžet sajuza dla vydačy hetaha kredytu.

Jak adznačaje Financial Times, pazicyja Budapiešta ahučanaja napiaredadni parłamienckich vybaraŭ u Vienhryi, jakija pryznačanyja na 12 krasavika. Sacyjałahičnyja apytańni pakazvajuć, što apazicyjnaja partyja «Cisa» na čale ź Pieteram Madziaram apiaredžvaje «Fides», partyju dziejnaha premjer-ministra Viktara Orbana, prykładna na 10 pracentnych punktaŭ.

Kamientary da artykuła