Ukrainskija chakiery vyśvietlili, jak apieratary rasijskich dronaŭ vykarystoŭvajuć Biełaruś

18 lutaha 2026 hoda prezident Ukrainy Uładzimir Zialenski abviaściŭ pra sankcyi suprać Alaksandra Łukašenki, abvinavaciŭšy jaho ŭ sadziejničańni Rasii ŭ praciahvańni vajny. Siarod pryčyn — raźmiaščeńnie ŭ druhoj pałovie 2025 hoda na biełaruskaj terytoryi sistemy retranślataraŭ dla kiravańnia dronami, što dazvoliła rasijskaj armii bolš efiektyŭna nanosić udary pa paŭnočnych abłaściach Ukrainy. Toje, što rasijskija apieratary ŭdarnych dronaŭ vykarystoŭvajuć terytoryju Biełarusi dla ŭzmacnieńnia atak suprać Ukrainy, vyśvietlili ŭkrainskija chakiery, piša InformNapalm. 

Ekran apierataraŭ rasijskich dronaŭ z typovym prakładańniem maršrutaŭ z terytoryi Rasii ŭzdoŭž unutranaj častki miažy Biełarusi dla dalejšych atak suprać Ukrainy

Nakładzienyja Zialenskim sankcyi stali vynikam praciahłaj kibierapieracyi, jakuju pravodziŭ ukrainski analityčny kibiercentr Fenix pry padtrymcy vałancioraŭ mižnarodnaj supolnaści InformNapalm.

Ekran tranślacyi prakładańnia maršrutaŭ ruchu. Sprava ŭ čacie možna zaŭvažyć pierapisku apierataraŭ

Chakiery ŭzłamali akaŭnty dziasiatkaŭ rasijskich vajskoŭcaŭ i atrymali dostup da sistem manitorynhu, jakimi karystalisia apieratary dronaŭ. Na praciahu bolš jak šaści miesiacaŭ jany patajemna nazirali za dziejańniami praciŭnika i pieradavali infarmacyju Siłam abarony Ukrainy, što dapamahała lepš supraćdziejničać atakam i źbirać raźvieddanyja pra maršruty palotaŭ.

Padčas analizu pierachoplenych paviedamleńniaŭ vyśvietliłasia, što Rasija vykarystoŭvała biełaruskuju cyvilnuju infrastrukturu, u tym liku viežy mabilnaj suviazi, dla prakładki maršrutaŭ dronaŭ. Heta zabiaśpiečvała ŭstojlivuju suviaź i dazvalała atakavać celi na poŭnačy i zachadzie Ukrainy. Časam drony zalatali navat na terytoryju krain NATA, i heta, pavodle analitykaŭ, było nie vypadkovaściu, a častkaj testavańnia novaj taktyki.

Ekran tranślacyi pracoŭnaha stała i softu rasijskich apierataraŭ dronaŭ, u jakim pieradajecca malunak z kamiery drona. Sprava ŭ čacie jość paviedamleńnie ad apieratara ź niknejmam user5214: «Bort YY12057 start štatna ŭ 11:08 kirunak n.p. Čarnihaŭ». Data: 25.09.2025

Ukrainskija śpiecyjalisty nie mahli kiravać dronami, ale mieli mahčymaść bačyć dziejańni apierataraŭ i svoječasova pieradavać infarmacyju. Za čas apieracyi byli naniesienyja ŭdary pa rasijskich kamandnych punktach i miescach zapusku dronaŭ, a taksama sarvanyja asobnyja płany praciŭnika.

Rasijskija drony-prymanki «Hierbiera» z charakternymi numarami YY32384 i YY31402, znojdzienyja na terytoryi Polščy

Razam z tym hety dośvied pakazaŭ, što kibierprastora stała paŭnavartasnym frontam vajny. Va Ukrainie ŭžo niekalki hadoŭ abmiarkoŭvajecca stvareńnie Kibiersiłaŭ, ale zakanadaŭčaje afarmleńnie hetaha pytańnia zaciahvajecca. Ekśpierty padkreślivajuć, što lehalizacyja i sistemnaja kaardynacyja kibierpadraździaleńniaŭ dazvoliła b maštabna raźvivać padobnyja apieracyi i ŭzmacnić abaronu krainy.

Abłomak chvastavoj častki drona-prymanki «Hierbiera» z numaram YY31704, znojdzieny na plažy ŭ Łatvii

Šaścimiesiačnaja kibierkampanija, jakaja raskryła vykarystańnie biełaruskaj infrastruktury dla rasijskich atak i testavańnie maršrutaŭ u bok krain NATA, stała dokazam taho, što vajna ŭ kibierprastory maje stratehičnaje značeńnie i patrabuje nie tolki prafiesijanałaŭ, ale i vyraznych dziaržaŭnych rašeńniaŭ.

Kamientary da artykuła