Štab-kvateru iranskich muł u Tehieranie atakavali ŭzbrojenyja «narodnyja madžachiedy»
Kala 250 «narodnych madžachiedaŭ» 23 lutaha napali na štab-kvateru muł Motachary na zachadzie Tehierana. Sto ź ich byli zabityja siłami iranskaha režymu, piša Bild.
Ilustracyjnaje fota. Ali Mohammadi / Bloomberg via Getty Images
«Narodnyja madžachiedy» (piers.: Mojahedin-e Khalq, MEK) — iranskaja apazicyjnaja arhanizacyja z šyicka-isłamisckimi i marksisckimi idejami. Z-za raniejšych uzbrojenych akcyj i teraktaŭ u Iranie i za miažoj jany niekalki hadoŭ znachodzilisia ŭ terarystyčnym śpisie ES.
150 bajcoŭ MEK da viečara paniadziełka «paśpiachova viarnulisia na svaje bazy», zajavili sami madžachiedy.
Fakt sutyknieńnia i kolkaść zahinułych taksama paćviardžaje ahienctva Tasnim, blizkaje da Korpusa vartavych isłamskaj revalucyi. Pra zdareńnie paviedamiła i hazieta Al-Akhbar, jakaja ličycca nieaficyjnym ruparam finansavanaj Iranam hrupoŭki «Chiezbała».
Al-Akhbar nazvała ataku «adnoj z samych niebiaśpiečnych i składanych apieracyj, praviedzienych MEK u Iranie pry pramoj padtrymcy zamiežnych śpiecsłužbaŭ». Hazieta namiakaje, što za atakaj staić izrailskaja raźviedka «Masad». Adnak nijakich paćvierdžańniaŭ hetaha niama.