Nastup Ukrainy na Poŭdni: jakija jaho mety i vyniki

Ukrainskaje vajskova-palityčnaje kiraŭnictva zajaviła, što paśpiachovyja dziejańni Uzbrojenych sił Ukrainy pryviali da vyzvaleńnia 8 nasielenych punktaŭ i sotniaŭ kiłamietraŭ terytoryi ŭ miežach Zaparožskaj i Dnieprapiatroŭskaj abłaściej. Adnak dahetul adkrytym zastajecca pytańnie: jaki realny maštab i kančatkovaja meta hetaj apieracyi na paŭdniovym froncie? Z hetym raźbirałasia Ukrainskaja słužba Bi-bi-si.

Hałaŭkam USU Alaksandr Syrski kaža, što mienš čym za miesiac ukrainskija vojski zmahli vyzvalić na Poŭdni kala 400 kv. km. Fota: Hałoŭnakamandujučy USU

Sieryju skaardynavanych nastupalnych dziejańniaŭ na hetym kirunku ŭkrainskija padraździaleńni pačali jašče ŭ kancy studzienia. Paźniej źjavilisia pieršyja paviedamleńni vajskoŭcaŭ pra vyzvaleńnie niekalkich nasielenych punktaŭ pobač z Hulajpolem (Zaparožskaja vobłaść), kudy raniej paśpieli pratačycca rasijskija dyviersijnyja hrupy.

Podpis da fota: Karta frontu va Ukrainie

Asnoŭnyja viektary atak ukraincaŭ — heta, akramia Hulajpola, taksama rajon Stepnahorska (horad za 20 km na poŭdzień ad Zaparožža), a taksama Alaksandraŭski kirunak, heta značyć učastak frontu pobač ź miastečkam Pakroŭskaje na Dnieprapiatroŭščynie.

Ataki ŭkraincaŭ supali ŭ časie z adklučeńniem dla rasijskaj armii sistem spadarožnikavaj suviazi Starlink. Vajskovyja ekśpierty zaŭvažajuć, što hetyja padziei mohuć być uzajemaźviazanyja, pakolki mienavita hetaja sietka była asnoŭnym srodkam kamunikacyi pamiž bajcami US RF na froncie.

Zajavy Ukrainy

U cełym apieracyja na Poŭdni prachodziła ŭ režymie infarmacyjnaj cišyni, pakul prezident Uładzimir Zielenski 20 lutaha nie zajaviŭ u intervju francuzskim ŚMI pra jaje pramiežkavyja vyniki.

«Nie budu ŭdavacca ŭ padrabiaznaści, ale ja mahu pavinšavać našu armiju: pa stanie na siońnia vyzvalenyja 300 kv. km na poŭdni», — skazaŭ jon.

Hałaŭkam USU Alaksandr Syrski 23 lutaha paviedamiŭ pra jašče bolšyja dasiahnieńni hetaj apieracyi. Jon adznačyŭ, što asabista naviedaŭ pazicyi ŭ Paŭdniovaj apieracyjnaj zonie, dzie ŭkrainskija vajskovyja čaści «nastupajuć i trymajuć abaronu».

«…Našy vajary nie tolki trymajuć abaronu, ale i paśpiachova dziejničajuć u nastupalnaj apieracyi. Z kanca studzienia hetaha hoda na Alaksandraŭskim kirunku hrupoŭka DŠV i sumiežnyja padraździaleńni adnavili kantrol nad 400 kv. km terytoryi i vaśmiu nasielenymi punktami», — zajaviŭ hałoŭnakamandujučy.

Alaksandr Syrski 23 lutaha naviedaŭ desantnyja častki, jakija nastupajuć na Alaksandraŭskim kirunku. Fota: Hałoŭnakamandujučy USU

Praŭda, u zajavie 8‑ha korpusa Desantna-šturmavych vojskaŭ (DŠV), jaki i pravodzić hetuju apieracyju, paznačana vyzvaleńnie 300, a nie 400 kv. km. Pres-sakratar korpusa Vadzim Karpiak zajaviŭ, što apieracyja USU była nakiravanaja na toje, kab sarvać płany praciŭnika zajści ŭhłyb Dnieprapiatroŭskaj i Zaparožskaj abłaściej.

«Apieracyja zastajecca dynamičnaj, ale jaje pieršyja vyniki ŭžo źmianili bałans na hetym učastku frontu», — dadaŭ jon.

Amierykanski analityčny centr «Instytut vyvučeńnia vajny» (ISW) aceńvaje pamier vyzvalenaj terytoryi na Poŭdni ŭ 165 kv. km.

«Ukrainskija siły praciahvajuć abmiežavanyja kontrataki ŭ hetych rajonach», — havorycca ŭ spravazdačy arhanizacyi za 24 lutaha.

Jakija vyniki

Pres-sakratar Paŭdniovaj hrupoŭki vojskaŭ USU Uładzisłaŭ Vałošyn patłumačyŭ Ukrainskaj słužbie Bi-bi-si, što, kažučy pra vyzvaleńnie 400 kv. km terytoryi, havorka idzie pra sumarnaje značeńnie vynikaŭ kontratakujučych dziejańniaŭ na ŭsich kirunkach.

«Skažam tak, havorka idzie i pra «šeruju zonu», i pra nasielenyja punkty, u jakich adnoŭleny kantrol. Heta taksama i pra praviedzienyja «začystki» tam, dzie praciŭnik tolki sprabavaŭ infiltravacca», — adznačyŭ jon.

Hieałakavanyja kadry pakazvajuć, što prasoŭvańnie ŭkrainskich sił adbyvajecca na poŭnač i paŭnočny ŭschod ad Stepnahorska (u rajonie siołaŭ Łukjanaŭskaje i Prymorskaje) i na poŭnač ad Hulajpola (u rajonie viosak Dabrapolle, Ciernavataje i Kosaŭcava).

Samy hłyboki «klin» u rasijskuju abaronu USU ŭdałosia prabić na Alaksandraŭskim kirunku.

Tut na miažy Dnieprapiatroŭskaj i Zaparožskaj abłaściej ukraincy zmahli adcisnuć rasijan ad vakolic Vialikamichajłaŭki i Pakroŭskaha i praciahvajuć prabivać abaronu praciŭnika na poŭdzień ad šerahu siołaŭ (Andrejeŭka, Vierbavoje i inš.). Takim čynam armija RF vyciaśniajecca z terytoryi Dnieprapiatroŭščyny, jakuju jana zachapiła minułym letam.

Aktyŭny ŭdzieł u nastupleńni na hetym učastku biare Pieršy asobny šturmavy połk imia Dźmitryja Kaciubajły. Jaho kamandzir, Hieroj Ukrainy Dźmitryj Fiłataŭ (pazyŭny «Piarun»), u razmovie z Ukrainskaj słužbaj Bi-bi-si kaža, što jahonyja bajcy ŭžo «ŭščylnuju nablizilisia» da vakolic siała Sałodkaje. Rasijanie zachapili jaho jašče ŭ śniežni 2025 hoda.

Dla čaho hetaja apieracyja

Kamandzir pałka kaža, što atakujučyja dziejańni USU majuć niekalki metaŭ, pierš za ŭsio — vyzvaleńnie Dnieprapiatroŭskaj vobłaści.

«Heta adna z metaŭ ahułam hetaj apieracyi», — zajaviŭ kapitan Dźmitryj Fiłataŭ.

Na anłajn-kartach OSINT-prajekta DeepState paznačana, što pa stanie na 25 lutaha akupavanymi na Dnieprapiatroŭščynie zastavalisia 5—6 nasielenych punktaŭ.

Jašče adna meta — spynić prasoŭvańnie rasijskaj armii ŭ bok Zaparožža i adkinuć jaje za raku Hajčur. U kancy minułaha hoda armija RF zmahła pierasiačy hetuju raku i pačać ruch u bok apošniaj ukrainskaj «krepaści» ŭ Zaparožskaj vobłaści — horada Arechaŭ.

Kamandzir 1 AŠP Dźmitryj Fiłataŭ («Piarun») kaža, što apieracyja na Poŭdni mieła źbić płany RF pa nastupie na Zaparožža. I hetaha ŭdałosia dasiahnuć. Fota: 1 AŠP

Kamandzir 1 AŠP tłumačyć, što mienavita Arechaŭ, jaki raźmieščany na vyšyniach, maje bolšaje stratehičnaje značeńnie dla abarony abłasnoha centra, čym Hulajpole:

«Hulajpole znachodzicca ŭ jamie i źjaŭlajecca stratehična niavyhadnym vuzłom abarony», — zajaviŭ Fiłataŭ.

Takim čynam, Ukraina ŭ kancy studzienia pierahrupavała vojski i pierakinuła dadatkovyja siły na hety kirunak mienavita dla taho, kab spynić prasoŭvańnie praciŭnika i nie dać jamu zaniać vyhadnyja pazicyi dla dalejšaha nastupu na Zaparožža. Hety płan stanam na zaraz udałosia realizavać, kaža kamandzir 1 AŠP.

Apošnija sproby armii RF prabicca na zachad ad Hulajpola ŭ rajonie siała Zaliźničnaje (Minabarony RF 10 lutaha zajaviła pra ŭziaćcie hetaha nasielenaha punkta) nie majuć apieratyŭnaha sensu, kaža kamandzir pałka, i, bolš za toje, pahražajuć akružeńniem usioj rasijskaj hrupoŭcy.

U toj ža čas jon taksama nie zaklikaje mieć vialikija čakańni ad ukrainskich kontratak na hetym učastku frontu. Pavodle jaho słoŭ, na hety momant niama zadačy prabicca ŭhłyb akupavanaj praciŭnikam terytoryi i, naprykład, vyzvalić horad Hulajpole.

«Heta nie kontrnastupleńnie, heta nastupalnyja dziejańni, jakija nakiravanyja pierš za ŭsio na stabilizacyju ŭčastka frontu, na spynieńnie prasoŭvańnia praciŭnika, palapšeńnie taktyčnaha stanovišča našych vojskaŭ i prymus praciŭnika vykarystać tyja reziervy, jakija jon nazapasiŭ, nie pa jaho zadumie, a pa našaj. Voś i ŭsio».

Bajcy 1 Asobnaha šturmavoha pałka viaduć ahoń z reaktyŭnaj sistemy załpavaha ahniu «Hrad» na Zaparožskim kirunku, luty 2026 hoda. Fota: 1 AŠP

Kiraŭnictva prajekta DeepState taksama ličyć, što apieracyja USU na Paŭdniovym froncie maje abmiežavany charaktar i pakul nie źjaŭlajecca kontrnastupleńniem.

Bolš za toje, niadaŭna vyzvalenyja USU terytoryi paznačanyja na mapie ŭsio jašče «šeraj zonaj», pakolki tam štodnia fiksujuć nastojlivyja sproby rasijan viarnuć stračanyja pazicyi, kaža suzasnavalnik prajekta Raman Pahareły.

«Ci moža heta pieraraści ŭ niešta bolšaje (z boku USU. — Red.)? Moža, hetaha nielha admaŭlać. Zaraz vorah taksama sprabuje sa svajho boku prymać niejkija rašeńni, padciahvać dadatkovyja resursy. Kali nam udasca złamać hety chod z boku voraha, naładzić łahistyku, pastaŭki, zamacavańnie i ŭdasca źbić temp praciŭnika, to heta moža pieratvarycca ŭ niejkija dalejšyja bolš hłybokija prasoŭvańni», — prahnazuje jon.

Adkaz Rasii

Ukrainskaje vajskovaje kamandavańnie paćviardžaje infarmacyju analitykaŭ, što RF pačała prymać kontrmiery, kab spynić nastup USU na Poŭdni. Havorka ŭ pieršuju čarhu idzie pra pierakidańnie dadatkovych sił i srodkaŭ.

Pres-sakratar Sił abarony Poŭdnia Uładzisłaŭ Vałošyn paviedamiŭ Bi-bi-si danyja raźviedki, što, u pryvatnaści, na hety ŭčastak frontu ŭžo pierakinutaja artyleryjskaja bryhada RF z Paŭdniova-Słabažanskaha kirunku, a taksama pieramiaščajucca značnyja siły desantnych vojskaŭ. «Faktyčna ŭsiu rasijskuju desanturu ściahvajuć siudy na poŭdzień», — skazaŭ jon.

Taksama rychtujucca novyja padraździaleńni apierataraŭ BPŁA, jakija nieŭzabavie buduć nakiravanyja bližej da linii frontu. Kamandzir 1 AŠP Dźmitryj Fiłataŭ paviedamiŭ, što ŭ jaho zonie adkaznaści zafiksavana pieramiaščeńnie dźviuch rasijskich bryhad marskoj piachoty ŭ rajon Hulajpola.

Na jaho dumku, usio heta śviedčyć pra toje, što mienavita nastup na Zaparožža budzie pryjarytetam stratehičnaj nastupalnaj apieracyi, jakuju Kreml płanuje pačać viasnoj hetaha hoda.

«Vorah, chutčej za ŭsio, sfakusuje svaju viasnovuju kampaniju mienavita na Zaparožskim kirunku… Ukrainskaje kamandavańnie bačyć heta i moža dać abjektyŭnuju acenku dziejańniam praciŭnika».

U štodzionnaj zvodcy Hienštaba USU fiksujecca imklivy rost kolkaści bajavych sutyknieńniaŭ mienavita kala Hulajpola, pačynajučy ź siaredziny lutaha. Naprykład, 25 lutaha tut zafiksavali 36 bajavych sutyknieńniaŭ, što źjaŭlajecca druhim vynikam paśla Pakroŭskaha kirunku.

Rasijskaje Minabarony nijak nie adreahavała na infarmacyju pra nastup USU na Poŭdni i praciahvaje amal štodnia paviedamlać pra «prasoŭvańnie» ŭłasnych vojskaŭ i zachop novych nasielenych punktaŭ u Zaparožskaj vobłaści.

Kamientary da artykuła