Na polskim TB spyniać tranślacyju adkryćcia Paralimpijady ŭ čas vychadu biełaruskich i rasijskich atletaŭ
Raniej čatyry jeŭrapiejskija krainy — Łatvija, Litva, Estonija i Finlandyja — uvohule admovilisia ad tranślacyi cyrymonii adkryćcia hulniaŭ.
Valancina Biryła i Lidzija Łoban. Fota: Minsporta Biełarusi
TVP padčas tranślacyi cyrymonii adkryćcia 6 sakavika Paralimpijskich hulniaŭ-2026 nie pakaža vychad rasijskich i biełaruskich spartoŭcaŭ na znak pratestu suprać ich dopusku da spabornictvaŭ.
Jak paviedamiła vydańnie Sport.tvp.pl, padčas vychadu rasiejskich i biełaruskich spartoŭcaŭ u efiry telekanała źjavicca zastaŭka z nadpisam: «Salidarnyja z Ukrainaj. TVP Sport suprać udziełu rasiejskich i biełaruskich spartoŭcaŭ u spabornictvach».
U vypadku, kali spartoŭcy Polščy vyjhrajuć srebny abo bronzavy miedal, a rasijanie ci biełarusy pieramohuć, u efiry pakažuć momant uznaharodžańnia, ale pierarvuć tranślacyju da vykanańnia himnaŭ i ŭźniaćcia nacyjanalnych ściahoŭ.
Raniej čatyry jeŭrapiejskija krainy — Łatvija, Litva, Estonija i Finlandyja — uvohule admovilisia ad tranślacyi cyrymonii adkryćcia hulniaŭ.
Zimovyja Paralimpijskija hulni projduć z 6 pa 15 sakavika ŭ tych ža łakacyjach na poŭnačy Italii, dzie prachodziła Alimpijada.
Na pačatku minułaha tydnia Mižnarodny paralimpijski kamitet dapuściŭ biełaruskich i rasijskich spartoŭcaŭ da Paralimpijady, tamu čatyry biełaruskija i šeść rasijskich spartoŭcaŭ zmohuć vystupić pad svaimi dziaržaŭnymi ściahami.
Čatyry biełaruskija kvoty pryznačanyja dla łyžnych honak (Lidzija Łoban, Valancina Biryła, Darja Fiadźkovič, Raman Śvirydenka).
Padčas Paralimpijady-2022 (4—13 sakavika 2022) biełaruskija i rasijskija spartoŭcy byli adchilenyja ad spabornictvaŭ praz pačatak poŭnamaštabnaj vajny. Pryčym jany byli adchilenyja za dzień da pačatku spabornictvaŭ.
Da ŭdziełu ŭ zvyčajnych Alimpijadach 2024 i 2026 hadach rasijskija i biełaruskija spartsmieny dapuskalisia ŭ niejtralnych statusie biez vykarystańnia ściahu i himna, pryčym udzieł bijatłanistaŭ i chakieistaŭ byŭ zabaronieny.