Kala Minadukacyi prajšła akcyja «Apošni zvanok Alaksandru Radźkovu»
Pobač z budynkam Ministerstva adukacyi Biełarusi ŭ Minsku 31 maja prajšła akcyja «Apošni zvanok Alaksandru Radźkovu». Kala 10 maładziožnych aktyvistaŭ u 15.00 stali łancuhom kala budynka i pačali źvinieć u zvanočki dla vypusknikoŭ.
Jak skazaŭ adzin z arhanizataraŭ akcyi, pretendent na pasadu kandydata ŭ prezidenty ŭ Biełarusi palityk Aleś Michalevič, hetaj akcyjaj jaje ŭdzielniki chacieli pakazać, što ministru adukacyi Alaksandru Radźkovu «daŭno para iści u adstaŭku».
«Nichto nie zrabiŭ dla razbureńnia biełaruskaj sistemy adukacyi bolš, čym Alaksandr Radźkoŭ.
Pry im byli likvidavany profilnyja kłasy, pamienšyłasia kolkaść hadzin vykładańnia zamiežnych moŭ, likvidavany taki nieabchodny z majho punktu hledžańnia pradmiet, jak «Suśvietnaja mastackaja kultura», a ŭ reformie adukacyi ź pieraskokvańniem z 11‑kłasnaj na 12‑kłasnuju sistemu navučańnia i nazad panuje poŭny bardak», — zajaviŭ Michalevič.
Pavodle jaho mierkavańnia, ciapier biełaruskaja sistema adukacyi skiravana na pavyšeńnie kolkaści studentaŭ, a nie na jakaść ich navučańnia. «My ličym, što ŭsie reformy adukacyi pavinny pravodzicca nie asobnym viedamstvam — Ministerstvam adukacyi, a ŭličvać mierkavańnie vykładčykaŭ i piedahohaŭ, jakija b udzielničali ŭ raspracoŭcy reformy. Ciapier heta nie robicca», — skazaŭ Michalevič.
Pavodle jaho słoŭ, zajava z patrabavańniem adstaŭki Alaksandra Radźkova była adpraŭlena na imia ministra siońnia ŭ Ministerstva adukacyi poštaj.
Akcyja praciahvałasia kala dziesiaci chvilin i zaviaršyłasia biez zatrymańniaŭ.
Alaksandr Radźkoŭ byŭ pryznačany ministram adukacyi ŭ žniŭni 2003 hoda.