Partyja rehijonaŭ paćvierdziła hrašovyja pretenzii Biełarusi da Ukrainy
Deputat Viarchoŭnaj Rady Ukrainy Leanid Kažara zajaviŭ, što Minsk vystaviŭ Kijevu dadatkovyja finansavyja pretenzii.
Siabra kamiteta Viarchoŭnaj Rady Ukrainy pa mižnarodnych spravach Leanid Kažara zajaviŭ, što Minsk sapraŭdy vystaviŭ Kijevu dadatkovyja finansavyja pretenzii.Pry hetym deputat ad Partyi rehijonaŭ adznačyŭ, što patrabavańnie Biełarusi vychodzić za miežy dasiahnutych raniej damoŭlenaściaŭ i «nie maje abjektyŭnaha sensu».
«Ukraina nie budzie datavać biełaruskuju ekanomiku, kali ŭ jaje niejkija prablemy. Ja liču heta (hrašovyja pretenzii — Telehraf) nieabhruntavanym», — padkreśliŭ ukrainski parłamientar ad kirujučaj partyi ŭ intervju «Novamu rehijonu».
Na dumku Leanida Kažary, kaštoŭnaść stasunkaŭ Ukrainy i Biełarusi «vychodzić za pytańni ŭzajemaspravazdač, jakija byli paśla raspadu SSSR».
«Ukraina sama pa sabie vielmi kaštoŭny partnior, i my kažam, što my majem ź Biełaruśsiu štohod bolš za čatyry miljardy dalaraŭ tavarazvarotu. Tamu my pavinny kłapacicca ab pierśpiektyvie, a nie dumać pra minułaje. I siońnia niejkija dadatkovyja patrabavańni ź biełaruskaha boku nie vyhladajuć abhruntavanymi. Jany nie nakiravanyja na raźvićcio dvuchbakovych stasunkaŭ», — kanstatavaŭ deputat Viarchoŭnaj Rady.
Jak raniej pieradavaŭ Telehraf, hazieta «Kommiersant‑Ukraina» paviedamiła 3 červienia, što Biełaruś admaŭlajecca farmalna zaviaršać praces ratyfikacyi pahadnieńnia ab dziaržmiažy z Ukrainaj, što nie ŭdavałasia zrabić apošnija 13 hadoŭ.
Paviedamlałasia, što nibyta zapłanavanaja na 28 červienia sustreča prezidentaŭ Alaksandra Łukašenki i Viktara Janukoviča nie adbyłasia praz toje, što ŭzamien na zakančeńnie pracesu ratyfikacyi pahadnieńnia ab dziaržaŭnaj miažy Minsk «patrabuje ad Kijeva vypłaty 130 młn. dalaraŭ nibyta najaŭnaha dziarždoŭhu».
U pres‑słužbie biełaruskaha lidera paźniej hetuju infarmacyju abvierhli.
Krynica ŭ ministerstvie zamiežnych spraŭ Ukrainy zajaviła, što Kijeŭ hatovy viarnuć Biełarusi tolki 50 młn. dalaraŭ dziarždoŭhu, jaki sfarmavaŭsia ŭ pačatku 1990‑ch hadoŭ. Astatniuju zapazyčanaść Ukraina prapanuje kampiensavać za košt źnižeńnia taryfaŭ na tranzit vieniesuelskaj nafty i elektraenierhii.