Kačavača Farłan

Najlepšym futbalistam čempijanatu śvietu nazvany ŭruhvajski forvard Dyjeha Farłan.

Najlepšym futbalistam čempijanatu śvietu nazvany ŭruhvajski forvard Dyjeha Farłan. Jon apiaredziŭ ispanca Davida Vilju, niderłandca Ueśli Snejdera, a taksama niemca Tomasa Miulera.

Farłan maje mianušku Kačavača — heta viadźmarka z papularnaha arhiencinskaha multsieryjału. Viadźmarka maryć narabić škody žycharam blizkaha horada, ale pry hetym čas ad času jakraz i vyratoŭvaje hetych žycharoŭ ad niebiaśpiečnych zładziejaŭ.

Kačavača — chutčej pazityŭnaja hierainia, choć i starajecca być admoŭnaj. Jana traplaje ŭ roznyja niedarečnyja historyi, a ŭ jaje miatle niama tarmazoŭ. Za vonkavaje i ŭnutranaje padabienstva Farłan i atrymaŭ takuju mianušku.

A jašče za suhučnaść z proźviščam jaho zvali Forlorn (niaščasny). Heta ŭ čas jahonaha znachodžańnia ŭ «Mančester Junajted». Tam uruhvajec tak i nie staŭ svaim, nie pryžyŭsia. Zatoje jak tolki jon pierajechaŭ u Ispaniju, u rodnuju moŭnuju i blizkuju kulturna prastoru, jak jahonaja hulnia znoŭ pačała vyłučacca filihrannaściu.

Farłan z futbolnaj siamji. Jahony baćka Pabła byŭ udzielnikam dvuch čempijanataŭ śvietu ŭ składzie Uruhvaja. A dzied pa matčynaj linii, arhienciniec Chuan Karłas Karasa, hulaŭ za «Independjente».

Tym nie mienš, Farłan-małodšy pieršapačatkova pačynaŭ zajmacca tenisam, a nie futbołam. Zrešty, dazvolić sabie prafiesijna raści ŭ tenisie mohuć tolki zabiaśpiečanyja siemji. Radzina Farłana nikoli nie adnosiłasia da takich, a tut jašče zdaryłasia trahiedyja.

U 1991 hodzie siastra Dyjeha Alechandra trapiła ŭ žudasnuju aŭtakatastrofu. Jaje bojfrend zahinuŭ na miescy, a dziaŭčyna vyžyła, ale na jaje lačeńnie spatrebilisia vialikija hrošy. U siamji takich nie było.

Lačeńnie Alechandry ŭziaŭ na siabie… Dyjeha Maradona, dobry siabra baćki Farłana.

«Jon skazaŭ mnie, što stanie vialikim futbalistam, kab zarabić hrošaj i vylečyć mianie», — kaža Alechandra. Jana tak i nie adužała kančatkova, daktary byli biaśsilnyja niešta zrabić. Chutčej za ŭsio, astatak žyćcia jana praviadzie ŭ invalidnym vazku. Ale heta nie stała dla jaje pieraškodaj, kab naviedać čempijanat u PAR.

Farłan nikoli nie hulaŭ za prafiesijnyja ŭruhvajskija kamandy. Jak tolki jon pačaŭ padavać nadziei, Maradona «ŭładkavaŭ» jaho ŭ arhiencinski kłub «Independjente» — toj samy, dzie hulaŭ dzied Farłana.

Potym byŭ pierachod u «Mančester Junajted», jaki kančatkova vyrašyŭ finansavyja prablemy ŭ siamji. Ciapier Dyjeha — hulec madrydskaha «Atletyka». U 102 hulniach za kłub hety 190-santymietrovy forvard zakałaciŭ 66 hałoŭ. Vydatny pakazčyk.

Sioleta jahony kłub vyjhraŭ Lihu Jeŭropy. Farłan byŭ pryznany najlepšym hulcom finału. A ciapier novaje pryznańnie.

Na mundyjali Farłan hulaŭ pryhoža i lohka. Na jahonym rachunku piać miačoŭ. Heta dazvoliła jahonaj krainie niečakana vyjści ŭ čaćviorku najmacniejšych kamandaŭ płaniety. I biez usialakaha čaraŭstva.

Heta hod kačavačy Farłana. Darečy, Maradona ŭładkavaŭ nie tolki futbolnaje, ale i asabistaje žyćcio forvarda. Mienavita jon paznajomiŭ uruhvajca z pryhažuniaj Zairaj Naraj, jakaja i stała žonkaj futbalista.

ZP

Kamientary da artykuła