Śviatkavańnie Dnia horada ŭ Minsku projdzie na 60 placoŭkach

Śviatkavańnie Dnia horada ŭ Minsku 11–12 vieraśnia projdzie prykładna na 60 placoŭkach. Ab hetym paviedamiła vykanaŭca abaviazkaŭ načalnika ŭpraŭleńnia kultury Minharvykankama Vitalina Rudzikava na pres-kanfierencyi 31 žniŭnia.

Śviatočnyja mierapryjemstvy pačnucca 10 vieraśnia ŭ Biełaruskim dziaržaŭnym muzyčnym teatry ŭračystaj cyrymonija ŭručeńnia ŭznaharod «Lepšy pa prafiesii» pa vynikach konkursu «Minski majstar».

11 vieraśnia, u subotu, u 11.00 adbudziecca ŭskładańnie kvietak da abieliska «Minsk — horad-hieroj». Vystava-kirmaš tavaraŭ staličnych pradpryjemstvaŭ projdzie ŭ subotu i niadzielu na placoŭcy kala Nacyjanalnaj biblijateki. Tam ža z 12.00 da 17.00 budzie arhanizavana śviatočnaja kancertnaja prahrama «Moj rodny Minsk — moj los, maja nadzieja!», jakaja zavieršycca vystupleńniem Nacyjanalnaha kancertnaha arkiestra Biełarusi pad kiraŭnictvam Michaiła Finbierha.

U hety ž dzień na terytoryi Vierchniaha horada kala ratušy projdzie śviata «Minsk teatralny» — uryŭki sa śpiektaklaŭ pakažuć artysty staličnych teatraŭ. Na vulicy Revalucyjnaja budzie arhanizavana śviata «Minski dvoryk», u prahramie jakoha — kaściumiravany teatralizavany pakaz, kancertnaja prahrama, fotavystava, vystava karcin maładych mastakoŭ i studentaŭ tvorčych VNU.

Kala Pałaca sportu 11 vieraśnia zapłanavana śviata sportu i mastactva. U jaho ramkach projduć vystava-kirmaš majstroŭ narodnaj tvorčaści «Kirmaš ramiostvaŭ», śviata miodu, prezientacyja sacyjalnaha taksi.

Na placoŭcy kala Pałaca kultury čyhunačnikaŭ z 12.00 da 16.00 zapłanavana maładziožnaja prahrama z vystupleńniem kamand KVZ, tvorčaj moładzi horada.

Uviečary 11 vieraśnia ŭ Nacyjanalnym akademičnym Vialikim teatry opiery i baleta buduć uručany ŭznaharody «Minčanin hoda», adbudziecca śviatočny kancert.

Kulminacyjaj śviatočnaha dnia stanie fiejervierk kala abieliska «Minsk — horad-hieroj» u 22.00, skazała Rudzikava. Paviedamlać padrabiaznaści jana nie stała, adznačyła tolki, što «heta budzie siurpryzam dla hledačoŭ».

Uviečary 12 vieraśnia kala teatra opiery i baleta projdzie kancert kłasičnaj muzyki. Budzie adkryta novaja placoŭka — kala kompleksu «Minsk-Arena» na praśpiekcie Pieramožcaŭ, na jakoj adbudziecca maładziožnaja akcyja «Lubimy horad, z dniom naradžeńnia» z udziełam kalektyvaŭ i vykanaŭcaŭ roznych tancavalnych kirunkaŭ i muzyčnych stylaŭ, cyrkavych artystaŭ.

Jak paviedamiŭ namieśnik načalnika ŭpraŭleńnia achovy pravaparadku i prafiłaktyki HUUS Minharvykankama Uładzimir Stanilevič, tradycyjna ŭ miescach masavych mierapryjemstvaŭ buduć ustanoŭlenyja aharodžy i KPP ź mietałašukalnikami. Budzie ŭzmocnieny kantrol darožnaha ruchu.

«Milicyja budzie ŭličvać i ŭmovy nadvorja i pravodzić adpaviednyja miery biaśpieki», — skazaŭ pradstaŭnik HUUS.

Pavodle jaho słoŭ, Minharvykankam pakul nie pryniaŭ rašeńnie nakont umoŭ prodažu śpirtnych napojaŭ i piva ŭ miescach masavych mierapryjemstvaŭ.

Kamientary da artykuła