Vital Rymašeŭski: Pieramahčy možna, kali ty hodny hetaj pieramohi
Pa skančeńni pracy źjezdu BCHD Vital Rymašeŭski adkazaŭ na pytańni «Našaj Nivy».
Pa skančeńni pracy źjezdu BCHD Vital Rymašeŭski adkazaŭ na pytańni «Našaj Nivy».
«Naša Niva»: Vital, heta ŭžo kančatkovaje rašeńnie ŭdzielničać u vybarach, ci buduć kansultacyi ź inšymi palitykami ab vyłučeńni adzinaha?
Vital Rymašeŭski: Kansultacyi ź inšymi kandydatami buduć. Što datyčyć pieramovaŭ ab vyłučeńni adzinaha, to ja nie maju paŭnamoctvaŭ pra heta paviedamlać.
«NN»: Raniej Pavieł Sieviaryniec zaznačaŭ, što BCHD nie maje nieabchodnaj kolkaści ludziej, kab sabrać 100 tysiač podpisaŭ.
VR: Zaŭsiody, kali pačynajecca kampanija, to nichto nie skaža, što maju nieabchodnuju kamandu. Ale hetyja słovy byli skazanyja, kali vybary tolki pačynalisia. Ciapier ža mahu skazać, što siabroŭ majoj inicyjatyŭnaj hrupy nie mieniej, čym u inšych kandydataŭ. Kali b ich niedastatkova dla mety, to naŭrad chto advažyŭsia ŭciahvacca ŭ kampaniju.
«NN»: A pierabiehaŭ da inšych kandydataŭ nie baiciesia?
VR: Nie bajusia. Kali niechta choča pracavać na inšaha kandydata, to čas sychodzić da jaho. Heta ja kažu na kožnaj sustrečy z partyjcami. Tym nie mienš, spakusilisia na bolšyja hrošy nie bolš za 5% siabroŭ majoj inicyjatyŭnaj hrupy. Padaŭlalnaja bolšaść zastałasia.
«NN»: Vy skazali, što šancy na pieramohu amal roŭnyja nulu. Dyk navošta tady ŭdzielničać u vybarach?
VR: Tak, pa‑čałaviečy šancy zusim nievialikija. Ale ŭ źviazcy z hetym ja skazaŭ: toje, što niemahčyma čałavieku, moža Haspodź. Pieramahčy možna tolki, kali ty budzieš hodny hetaj pieramozie i hetamu narodu. Chto dumaŭ, što na Płošču ŭ 2006 hodzie vyjdzie tak šmat narodu. Ale tady niezdavalniajučy paviali siabie lidery. Siońnia BCHD prapanuje alternatyvu pamiž aŭtarytaryzmam i tatalnaj razbeščanaściu. Takoha niama ni ŭ Łukašenki, ni ŭ inšych apazicyjnych kandydataŭ.
«NN»: A varyjant z bajkotam nie razhladaŭsia?
VR: Razhladaŭsia. Vykažu tut svajo mierkavańnie, što bajkot mahčymy tolki, kali jaho padtrymajuć siabry inšych palityčnych arhanizacyj. Adnoj siłaj pravieści bajkot amal niemahčyma. Na źjeździe bolšaść delehataŭ prahałasavała za bajkot u vypadku nierehistracyi mianie kandydatam u prezidenty.
«NN»: Jakija Vašy nastupnyja kroki jak kandydata?
VR: Budu rabić usio toje, što rabiŭ da hetaha: praciah našych inicyjatyvaŭ, sustrečy ź ludźmi, dapracoŭka prahramy.
Vital Rymašeŭski
naradziŭsia ŭ 1975 hodzie ŭ Babrujsku. Zakončyŭ budaŭničy fakultet Biełaruskaha nacyjanalnaha techničnaha ŭniviersitetu pa śpiecyjalnaści «Inžynier‑budaŭnik». U traŭni 2009 hodu byŭ abrany kandydatam ad BCHD na nastupnych prezidenckich vybarach. Žanaty, maje dačku.