Biełastockaja «Niva» śviatkuje 50-hodździe
Siońnia ŭ Biełastoku pačalisia ŭračystaści z nahody 50-j hadaviny zasnavańnia tydniovika biełarusaŭ Biełastoččyny «Niva» – «Biełaruskija dni Nivy».
Siońnia ŭ Biełastoku pačalisia ŭračystaści z nahody 50-j hadaviny zasnavańnia tydniovika biełarusaŭ Biełastoččyny «Niva» – «Biełaruskija dni Nivy».
Pieršy numar tydniovika biełarusaŭ Polščy «Niva» pabačyŭ śviet 4 sakavika 1956 hodu. Niahledziačy na žorstkuju cenzuru, jakaja panavała ŭ tyja časy, daśledčyki historyi biełaruskaj mienšaści na Biełastoččynie adznačajuć, što źjaŭleńnie pieršaha peryjadyčnaha vydańnia na rodnaj movie stała adnym z hałoŭnych faktaraŭ pavajennaha hurtavańnia biełaruskaj intelihiencyi ŭ Polščy, a dla dziasiatkaŭ tysiačaŭ biełarusaŭ Polščy śviedčańniem taho, što jany majuć prava i pavinny šanavać svaju kulturu, zvyčai, abrady.
U historyi «Nivy» byli roznyja peryjady – jaje aŭtaraŭ abvinavačvali to ŭ biełaruskim nacyjanaliźmie, to ŭ niedastatkovaj partyjnaj pilnaści, a ŭžo zusim niadaŭna abvinavacili navat u «niapravilnym vykarystańni biudžetnych srodkaŭ» – finał sudovaha pracesu sioletniaj viasnoj, u jakim «niŭcaŭ» całkam apraŭdali, staŭsia adnoj z pryčynaj pieranosu śviatkavańnia jubileju tydniovika na vosień.
Hałoŭnamu redaktaru «Nivy» Jaŭhienu Vapu ja patelefanavaŭ za paŭhadziny da siońniašnich uračystaściaŭ. Pytańnie davoli tradycyjnaje – jak adčuvaje siabie tydniovik majučy 50 hadoŭ?
(Vapa: ) «50 hadoŭ pa-za miežami Biełarusi, dy jašče dla tydniovika – heta šmat. My, jak biełaruskaja nacyjanalnaja mienšaść u Polščy, hanarymsia tym, što tydniovik jość. Dumaju, što budzie i dalej. Budzie, kali budzie tut žyć biełaruskaść. A biełaruskaść budzie žyć, kali budzie raźvivacca našaja duchoŭnaja prastora, a «Niva» – adzin ź jaje elementaŭ».
Dla «Nivy» pisali i pišuć šerah dobra viadomych nia tolki na Biełastoččynie i ŭ Polščy aŭtaraŭ – Sakrat Janovič, Aleh Łatyšonak, Mira Łukša, Jaŭhien Miranovič dy inšyja.
Pierada mnoj – pieradapošni numar «Nivy» – pryvabna źviarstanaja hazeta z šeraham samych roznych rubryk. Tut možna pračytać i pra hlabalnyja prablemy biełaruskaj i inšych mienšaściaŭ Padlašša – finansavańnie kulturnickich imprezaŭ, adsutnaść vialikaha festyvalu mienšaściaŭ, udzieł biełarusaŭ u majučych adbycca miascovych vybarach, ale taksama i pra toje, čym žyvuć nievialikija vioski na Biełastoččynie. Jość histaryčnyja artykuły, kamentary biahučych palityčnych padziejaŭ, abaviazkovy dadatak dla dziaciej «Zoračka».
Takim čynam, vyhladaje, što «Niva» pačuvajecca niadrenna. Na pytańnie pra plany redakcyi na budučyniu, Jaŭhien Vapa adkazvaje koratka:
(Vapa: ) «Plan taki – pašyracca i prydbać novych čytačoŭ! Dumaju, usio heta ździejśnicca».
Zaŭtra kanferencyja, u jakoj biaruć udzieł viadomyja navukoŭcy i litaratary – Sakrat Janovič, Barys Piatrovič, Aleh Łatyšonak i inšyja – praciahniecca. Zavieršacca «Biełaruskija dni Nivy» ŭračystym kancertam.