Misiju naziralnikaŭ SND uznačalić kaleha Sańnikava pa Dypakademii
Heta były kiraŭnik Słužby zamiežnaj raźviedki Rasii Siarhiej Lebiedzieŭ.
Misijaj ad SND budzie arhanizavanaje doŭhaterminovaje i karotkaterminovaje nazirańnie za prezidenckimi vybarami ŭ Biełarusi. Pra heta paviedamili ŭ Vykankamie SND.
Terminy pačatku pracy naziralnikaŭ buduć vyznačany paśla pryznačeńnia kiraŭnika misii i akredytacyi naziralnikaŭ u Centrvybarkamie. Zapyt na atrymańnie ankiet dla akredytacyi ŭ CVK Vykankam SND užo nakiravaŭ.
Čakajecca, što 23 vieraśnia na pasiadžeńni Savieta pastajannych paŭnamocnych pradstaŭnikoŭ pry statutnych i inšych orhanach SND na pasadu kiraŭnika misii budzie ŭzhodnienaja kandydatura vykanaŭčaha sakratara SND Siarhieja Lebiedzieva.
20 vieraśnia Vykankam SND nakiravaŭ listy prezidentam krain Sadružnaści, u Parłamiencki schod Sajuza Biełarusi i Rasiei i mižparłamienckuju asambleju SND z prośbaj vyznačyć kandydataŭ dla ŭdziełu ŭ misii nazirańnia.
21 vieraśnia anałahičny zvarot byŭ nakiravany ŭ zamiežnapalityčnyja viedamstvy i centrvybarkamy krain SND.
Jak raniej paviedamlaŭ navinavy partał udf.by, naziralniki ad SND za prezidenckimi vybarami pačnuć pracavać u Biełarusi ŭ bližejšyja dni. Takija dadzienyja pryviała staršynia Centralnaj kamisii pa vybarach i praviadzieńni respublikanskich refierendumaŭ Lidzija Jarmošyna.
Siońnia staršynia Abjadnanaj hramadzianskaj partyi Anatol Labiedźka zajaviŭ, što było b dobra, kali b i misija SND i misija ABSIE pa nazirańni za prezidenckimi vybarami ŭ Biełarusi abjadnali svaje namahańni. Jak vykazaŭsia palityk, «idealnym varyjantam była b adna sistema nazirańnia pad ehidaj ABSIE, tym bolš što krainy SND źjaŭlajucca siabrami ABSIE».
* * *
Siarhiej Lebiedzieŭ — staršynia Vykanaŭčaha kamiteta — Vykanaŭčy sakratar SND z 5 kastryčnika 2007 hoda — naradziŭsia 9 krasavika 1948 hoda va Uźbiekistanie. Skončyŭ u 1970 hodzie Čarnihaŭski filijał Kijeŭskaha politechničnaha instytuta. Z 1973 hoda — u orhanach dziaržbiaśpieki, z 1975 hoda — u źniešniaj raźviedcy (Pieršaje hałoŭnaje ŭpraŭleńnie KDB SSSR). Maje kontrraźviednickuju padrychtoŭku (Kijeŭskaja škoła KDB) i raźviedadukacyju (Čyrvanaściažny instytut KDB). U 1978 hodzie skončyŭ z adznakaj Dypłamatyčnuju akademiju MZS SSSR. Vałodaje niamieckaj i anhielskaj movami. 20 traŭnia 2000 hoda Ukazam prezidenta RF pryznačany dyrektaram Słužby źniešniaj raźviedki Rasiei. Voinskaje zvańnie — hienierał armii. Maje šerah dziaržaŭnych uznaharod. 27 sakavika 2009 hoda Ukazam prezidenta RF prysvojeny dypłamatyčny ranh Nadzvyčajnaha i Paŭnamocnaha Ambasadara. Chobi — praca, siamja, lecišča.