Alaksandar Łukašenka sustreŭsia ź Ilchamam Alijevym
Kiraŭnik Biełarusi pravioŭ pieramovy z prezydentam Azerbajdžanu Ilchamam Alijevym, jaki znachodzicca ŭ Miensku z aficyjnym vizytam. Abodva baki zajavili pra mahčymaje pašyreńnie ekanamičnaha supracoŭnictva j padpisali adpaviednuju damovu.
Kiraŭnik Biełarusi pravioŭ pieramovy z prezydentam Azerbajdžanu Ilchamam Alijevym, jaki znachodzicca ŭ Miensku z aficyjnym vizytam. Abodva baki zajavili pra mahčymaje pašyreńnie ekanamičnaha supracoŭnictva j padpisali adpaviednuju damovu.
Z aficyjnymi vizytami kiraŭniki krain pryjaždžajuć u Biełaruś niačasta. Apošni taki vizyt adbyŭsia ŭ lipieni: aficyjny Miensk sustrakaŭ prezydenta Venesueły Uha Čavesa. Ciapier padčas sustrečy Ilchama Alijeva kiraŭnik Biełarusi zajaviŭ pra hatoŭnaść da supracoŭnictva ŭ lubych pytańniach. Maŭlaŭ, dla Azerbajdžanu, jak i dla mnohich inšych braterskich krainaŭ, zakrytych temaŭ niama.
Ilcham Alijeŭ zajaviŭ, što kiraŭnika Biełarusi padtrymlivaje pieravažnaja bolšaść nasielnictva – i heta daje mahčymaść aktyŭna pravodzić reformy.
Azerbajdžanski parlamentar, były dakładčyk Rady Eŭropy ŭ biełaruskim pytańni Azim Małazade zajaviŭ:
(Małazade: ) «U mnohich sferach u Biełarusi niby zamarožany Saviecki Sajuz. I mnie vielmi ciažka skazać, jakija reformy Łukašenka pravodzić u Biełarusi. Biełaruś maje nehatyŭnuju sytuacyju z pravami čałavieka, jość palitźniavolenyja j pieraśledujucca apanenty. Usio heta jość padstavaj dla adpaviednaj palityki Eŭraźviazu j ZŠA. Nie chaciełasia b, kab narod Biełarusi ciarpieŭ ad svajho kiraŭnika, palityka jakoha adnosicca chutčej da minułaj epochi, čym da budučaha dnia».
Pavodle mienskaha palitolaha spadara Fiodarava, z boku Azerbajdžanu heta chutčej vizyt vietlivaści. Jon byŭ prymierkavany da samitu kiraŭnikoŭ krainaŭ SND. Samit planavaŭsia 17 kastryčnika, ale potym jaho pieranieśli na inicyjatyvu Rasiei. Nahadajem, što Azerbajdžan razam z Hruzijaj, Ukrainaj i Małdovaj uvachodzić u miždziaržaŭnuju arhanizacyju HUAM. Jana aryjentujecca na eŭrapiejskija struktury i ZŠA.
(Fiodaraŭ: ) «Adčuvajučy cisk z boku Maskvy, Biełaruś choča znajści niejkich chaŭruśnikaŭ, dzie tolki moža, pakolki na Zachadzie znajści ich ciažka. U ekanamičnym i palityčnym sensie nielha vyklučyć takoha z Azerbajdžanam taksama – kab atrymać niejkuju padtrymku suprać Kramla, chacia b maralnuju».
Kiraŭnik Biełarusi nahadaŭ, što ŭ jaho zaŭsiody byli vielmi dobryja dačynieńni z kiraŭnictvam Azerbajdžanu i asabliva z baćkam Ilchama Alijeva. Nahadajem, Hiejdar Alijeŭ na vybarach u 2003 hodzie źniaŭ svaju kandydaturu na karyść syna. Łukašenka nazvaŭ Hiejdara Alijeva bieskampramisnym baraćbitom z pravaparušeńniami, asabliva ŭ sfery karupcyi.
Źviartajučysia da Ilchama Alijeva, Łukašenka adznačyŭ, što toj padobny da baćki.
Fota president.gov.by