Zamiest syna hienierała Sucharenki ŭ Strasburh pajechaŭ syn hienierała Kryvašejeva

Niekatoryja žartam nazyvajuć pasadu pieršaha sakratara Pradstaŭnictva Respubliki Biełaruś pry Radzie Jeŭropy ŭ Strasburhu tramplinam dla hienieralskich synoŭ.

Nahadajem, što nie tak daŭno ŭ Strasburhu razam z daradcam pradstaŭnictva Biełarusi pry Radzie Jeŭropy Andrejem Bušyłam pracavaŭ syn byłoha staršyni KDB Ściapana Sucharenki Andrej. Adnosna niadaŭna Andrej Sucharenka viarnuŭsia ŭ Minsk — pajšoŭ na pavyšeńnie. A jahonaje miesca zaniaŭ syn hienierał-majora Juryja Kryvašejeva Dźmitryj.

Hienierał Juryj Vasiljevič Kryvašejeŭ zaraz pracuje ŭ Administracyi prezidenta.

Jon uznačalvaje hałoŭnaje ŭpraŭleńnie kadravaj palityki.

Jašče Kryvašejeŭ źjaŭlajecca sakratarom atestacyjnaj kamisii, stvoranaj pry kiraŭniku dziaržavy, staršynia jakoj — kiraŭnik Administracyi prezidenta Uładzimir Makiej.

U studzieni 2006 hoda Juryj Vasiljevič byŭ pryznačany vykonvajučym abaviazki dziaržsakratara Rady biaśpieki. Ale na hetaj pasadzie jon byŭ nie vielmi doŭha. Raniej pałkoŭnik KDB Juryj Kryvašejeŭ pracavaŭ adnym z namieśnikaŭ dziaržsakratara Rady biaśpieki, uznačalvaŭ adździeł supracoŭnictva ŭ halinie mižnarodnaj biaśpieki Rady biaśpieki.

U svoj čas, pryznačajučy Juryja Kryvašejeva na pasadu namieśnika dziaržsakratara, A.Łukašenka zaŭvažyŭ, što hetuju asobu jamu rekamiendavali ludzi, jakim jon asabista daviaraje. Juryja Kryvašejeva kiraŭnik dziaržavy nazvaŭ česnym čałaviekam.

Zvańnie hienierał-majora Juryj Kryvašejeŭ atrymaŭ 22 lutaha 2008 hoda.

Hod tamu Andrej Sucharenka ŭchiliŭsia ad adkazu na pytańnie, ci dapamahaŭ jamu baćka pracaŭładkavacca.

Ja nie chacieŭ by abmiarkoŭvać svaju bijahrafiju», — adkazaŭ jon. I dadaŭ, što z baćkam nikoli nie abmiarkoŭvaje pracoŭnyja momanty.

Małady dypłamat Dźmitryj Kryvašejeŭ nie choča, kab niechta ličyŭ, što svaim ciapierašnim miescam pracy jon abaviazany baćku. I tamu navat svaim kaleham Dźmitryj Jurjevič starajecca nie kazać, što jahony tata — hienierał pry pasadzie. A kali Kryvašejevu-małodšamu zadajuć hetaje pytańnie ŭ łob, jon prosić nie zasiarodžvać uvahu na hetym fakcie.

Tym nie mienš hazieta pacikaviłasia, ci dapamahaje hienierał budavać karjeru svajmu synu-dypłamatu.

— Heta plotki, što ja byccam by dapamahaju synu rabić karjeru, — vielmi spakojna adkazaŭ Juryj Kryvašejeŭ.

— Zrazumiejcie mianie pravilna, ja nie chacieŭ by davać niejkija kamientaryi na hetuju temu. Moj syn bliskuča skončyŭ vyšejšuju navučalnuju ŭstanovu. A ja nie ŭvieś čas na hetaj vysokaj pasadzie, tamu navošta havaryć pra tatu, kali syn vučycca i pracuje samastojna? Davajcie, kali łaska, budziem prystojnymi i česnymi…

Kamientary da artykuła