Šroder Pucina kachaje
Vyjšła kniha ŭspaminaŭ eks-kanclera FRH
«Jahonaja ścipłaść – niezvyčajnaja», «naviedvajučy Ludmiłu i Ŭładzimiera Pucinych, spaznaješ sapraŭdnuju haścinnaść», «kab kiravać takoj vialikaj krainaj, treba być vyklučna spraŭnym i dyscyplinavanym» – hetak ciopła były kancler Niamieččyny Hierchard Šroder piša pra Ŭładzimiera Pucina.
«Jahonaja ścipłaść – niezvyčajnaja», «naviedvajučy Ludmiłu i Ŭładzimiera Pucinych, spaznaješ sapraŭdnuju haścinnaść», «kab kiravać takoj vialikaj krainaj, treba być vyklučna spraŭnym i dyscyplinavanym» – hetak ciopła były kancler Niamieččyny Hierchard Šroder piša pra Ŭładzimiera Pucina.
Nie prajšoŭ i hod paśla sychodu Šrodera z palityki, jak jon vydaŭ knihu svaich uspaminaŭ. U joj jon abaraniaje Ŭładzimiera Pucina, łaje Anhiełu Merkiel dy pieraścierahaje ad polskaj niepryjaznaści da Rasiei.
Nivodzin niamiecki kancler nia vydaŭ uspaminaŭ hetak chutka paśla svajho sychodu z pasady i taksama nivodzin nia trapiŭ na taki dobry momant. Kali niemcy čytajuć frahmenty knižki pad nazvaj «Rašeńni. Majo žyćcio ŭ palitycy» («Entscheidungen. Mein Leben in der Politik»), urad Anhieły Merkiel stračvaje papularnaść.
U knižcy Šroder baronić svaju zamiežnuju palityku – palityku zbližeńnia z Rasiejaj Pucina. Ciapierašni niamiecki ŭrad Merkiel i Eŭropa buduć mieć bolš chałodnyja stasunki z Rasiejaj, nadajučy bolšuju ŭvahu zachavańniu Maskvoj pravoŭ čałavieka i svabody słova. Šroder pieraścierahaje ad hetkaj źmieny. «Niezaležnaść u niamieckaj zamiežnaj palitycy moža być zhublenaja praz čaplańnie za amerykanskuju spadnicu», – śćviardžaje jon. Šroder baicca, kab antyrasiejskaja pieraduziataść, vyklikanaja intaresami ZŠA dy «histaryčnaj polskaj niepryjaznaściu da susieda», nie sapsavała ŭzajeminaŭ Eŭropy z Rasiejaj.
Jon taksama piša pra toje, što Pucin – čałaviek, jaki zajmaje «najbolš składanuju pasadu ŭ śviecie» – žadaje adbudavać Rasieju jak vialikuju dziaržavu. Dla hetaha jamu patrebnaja Eŭropa. «Pucin spadziajecca, što Eŭropa, asabliva Niamieččyna, dapamohuć jamu ŭ hetym», – śćviardžaje Šroder, jaki niekali nazvaŭ rasiejskaha prezydenta «kryštalnym demakratam». Taksama jon abaraniaje budaŭnictva Paŭnočnaha hazapravodu, jaki maje złučyć Niamieččynu i Rasieju, a Polšču abminie. Šroder paśla sychodu z palityki staŭ kiraŭnikom naziralnaj rady kampanii, jakaja buduje hazapravod. «Mnie kazali, što ŭdzieł u hazapravodzie nakiravany suprać niamieckich intaresaŭ. Ale sytuacyja advarotnaja. Tamu ja čakaŭ na ŭchvału», – kaža eks-kancler.
Pra Džordža Buša, jakoha Šroder sprabavaŭ utrymać ad napadu na Irak i jakoha paźniej krytykavaŭ, jon piša chałodna. Ličyć jaho zanadta bohabajaznym. «Ja mahu zrazumieć, što možna być vielmi vierujučym i budavać svajo pryvatnaje žyćcio na razmovach z Boham. Prablemy pačynajucca tam, dzie na hetkaj padstavie prymajucca palityčnyja rašeńni», – miarkuje Šroder.