Polski Sojm rychtuje žorstkuju rezalucyju pa Biełarusi
Samaja šmatlikaja apazicyjnaja partyja Polščy «Prava i spraviadlivaść» vystupaje za adnaŭleńnie sankcyj u dačynieńni režymu Alaksandra Łukašenki.
«PiS» padrychtavała prajekt rezalucyi, jakuju siejm Polščy moža razhledzieć užo ŭ bližejšy čas.
«Pamiatajučy pra tradycyi polskaj baraćby za demakratyju i pravy čałavieka sojm Polščy asudžaje falsifikacyju vynikaŭ śniežańskich prezidenckich vybaraŭ u Biełarusi i fakt ździajśnieńnia palityčnych represijaŭ režymam Alaksandra Łukašenki», — viadziecca ŭ prajekcie rezalucyi.
Aŭtary dakumienta padkreślivajuć, što ŭ Biełarusi byli aryštavanyja kala 700 čałaviek, u tym liku i apazicyjnyja kandydaty na pasadu prezidenta. Aŭtary adznačajuć, što «z zatrymanymi žorstka abychodzilisia, bili i abražali aryštavanych, trymali ŭ niečałaviečych umovach, asudžali na pazbaŭleńnie voli mietadami, jakija nie majuć ničoha ahulnaha z normami zakona».
Sojm Polščy «zaklikaje Ministerstva zamiežnych spraŭ ŭvieści dypłamatyčnyja sankcyi ŭ dačynieńni režymu Łukašenki, zachoŭvajučy pry hetym pryncyp supracoŭnictva hramadskaści Polščy i Biełarusi». U prajekcie rezalucyi taksama źmiaščajecca zaklik da ŭładaŭ Biełarusi adpuścić usich apazicyjanieraŭ.