Hančarenka: My možam udała zhulać u Paryžy i prajści dalej

Hałoŭny trenier barysaŭskaha BATE Viktar Hančarenka nie vielmi rasčaravany vynikam 2:2 u damašnim matčy 1/16 finału Lihi Jeŭropy suprać francuzskaha «Pary Sien-Žermiena».

«Niama takoha rasčaravańnia, kab zasłona stajała pierad vačyma. Mnie spadabałasia staŭleńnie kamandy da hulni; što ŭdałosia prybavić u druhim tajmie. Ja vieru ŭ kamandu, u nas jašče jość matč u adkaz», — skazaŭ Hančarenka na pres-kanfierencyi paśla zakančeńnia sustrečy.

Adkazvajučy na pytańnie francuzskaha žurnalista, ci nie źbirajecca BATE paŭtaryć pośpiech nacyjanalnaj zbornaj Biełarusi, jakaja minułaj vosieńniu ŭ adboračnym turniry čempijanatu Jeŭropy-2012 vyjhrała ŭ haściach u francuzaŭ 1:0, trenier barysaŭčan zajaviŭ: «Niama ničoha niemahčymaha. Možna ŭdała zhulać u Paryžy i prajści dalej».

Hančarenka pryznaŭsia, što pa haračych śladach jamu ciažka kamientavać epizod na 86-j chvilinie, kali napadajučy Maksim Skavyš moh pavialičyć lik da 3:1, ale pramachnuŭsia ź piaci mietraŭ.

Hałoŭny trenier BATE adznačyŭ hulniu navičkoŭ Hardziejčuka, Rudzika i Simiča. Michaił Hardziajčuk zabiŭ praz šeść chvilin paśla vychadu na zamienu i zrabiŭ lik 2:1. Rudzik i Simič zhulali «nie biez pamyłak», ale toje ž možna skazać i pra astatnich, skazaŭ Hančarenka.

Nastaŭnik «PSŽ» Antuan Kambuare ličyć, što vynikovy lik łahičny. «Heta dobry vynik. Ja ŭžo kazaŭ: kab zachavać šancy na matč u adkaz, treba zabivać na vyjeździe. Barysaŭ zabiŭ pieršym, zatym jašče raz vyjšaŭ napierad, ale my akazalisia zdolnyja dvojčy zraŭnavać lik. Miač Piehi Luindziuła ŭ kancy sustrečy sasłužyŭ nam dobruju słužbu i ablehčyŭ baraćbu za vychad u nastupny raŭnd», — zaznačyŭ trenier haściej.

Kambuare pavinšavaŭ abiedźvie kamandy, jakija «pry składanym nadvorji zdoleli pravieści dobry matč», a taksama zapasnych hulcoŭ, jakija byli vyprabavany choładam. «Zabić čatyry miačy — heta było niaprosta», — skazaŭ nastaŭnik «PSŽ».

Trenier francuzaŭ zajaviŭ ab važnaści adnavić siły pierad matčam u adkaz. «Ja čakaju, što hulnia budzie ciažkaj», — skazaŭ Kambuare.

Paŭtorny pajadynak projdzie ŭ Paryžy na stadyjonie «Park de Prens» 24 lutaha. Pačatak u 22.05 pa minskim časie.

Kamientary da artykuła