U Rasii łoviać miljardera, jaki davioŭ da bankructva «Ižaŭto»

Śledčy kamitet abviaściŭ u vyšuk byłych kiraŭnikoŭ kampanii «Ižaŭto» i hrupy SAK. Ad śledstva chavajecca ŭ tym liku miljarder Juryj Kačmazaŭ. Top-menedžary abvinavačvajucca ŭ naŭmysnym bankructvie «Ižaŭto» i vyvadzie majomaści na sumu 6,7 młrd rasijskich rubloŭ.

Padčas rasśledavańnia kryminalnaj spravy pa fakcie naŭmysnaha bankructva kancerna «Ižaŭto» orhany MUS Rasii abviaścili ŭ vyšuk byłych top-menedžaraŭ kampanii. U pryvatnaści, ad śledstva chavajucca ŭłaśnik hrupy SAK, miljarder Juryj Kačmazaŭv, top-menedžary kampanii Andrej Frałoŭ i Juryj Amielin, były hienieralny dyrektar AAT «Ižaŭto» Michaił Dabynda i dyrektar pa ekanomicy i finansach Jaŭhien Strachaŭ. Usie jany abvinavačvajucca ŭ naŭmysnym bankructvie «Ižaŭto».

«Ustupiŭšy ŭ zmovu, jany ažyćciavili dziejańni pa vyvadzie likvidnaj majomaści — hrašovyja srodki, aŭtamabili, akcyi i doli ŭ statutnych kapitałach inšych pradpryjemstvaŭ «Ižaŭto», — paviedamili ŭ SK MUS.

Pa dadzienych śledstva, u pieryjad z 2008 pa 2009 hod Kačmazaŭ, čyja majomaść, pa dadzienych Forbes, u 2007 hodzie aceńvałasia ŭ $700 młn, sumiesna z Dabyndam i šeraham kiraŭnikoŭ kampanii vyvieli likvidnuju majomaść «Ižaŭto» na sumu bolš za 6,7 młrd rasijskich rubloŭ ($228 młn).

Kamientary da artykuła