U Połacku sudździu z suda advieźli ŭ balnicu
Razhlad skarhi Viktara Kaleśnika suprać Połackaha harvykankama pačała raźbirać sudździa Iryna Darodka, ale padčas pierapynku ŭ pracesie joj zrabiłasia błaha, i žančynu zabrała «chutkaja dapamoha».Praciahvać razbor daručyli sudździ Taćcianie Subocinaj. U Hłybokim sud taksama zajmajecca vodhukami vybaraŭ.
Sud Hłybockaha rajona 10 sakavika budzie razhladać administracyjnuju spravu miascovaha aktyvista i žurnalista Kastusia Šytala, jakoha vinavaciać u parušeńni vybarčaha zakanadaŭstva. Jak ćvierdzić jahonaja byłaja
A ŭ Połackim sudzie maje adbycca praciah sudovaha razboru, inicyjavanaha miascovym demakratyčnym aktyvistam Viktaram Kaleśnikam.
Namieśnica staršyni połackaha harvykankama zabaraniła spadaru Kaleśniku pravieści akcyju salidarnaści z palitviaźniami — udzielnikami minskich padziejaŭ 19 śniežnia.Kaleśnik ličyć, što čynoŭnica parušaje jaho hramadzianskija pravy na praviadzieńnie mirnych schodaŭ i svabodu vykazvańnia ŭłasnych mierkavańniaŭ.
I Kastuś Šytal, i Viktar Kaleśnik źjaviacca ŭ sud užo pa druhim razie.
Inicyjataram sudovaj spravy suprać Kastusia Šytala stała Maryja Maculevič, jakaja była naziralnicaj na prezidenckich vybarach ad «Biełaruskaha sajuza žančyn». Jana napisała skarhu ŭ prakuraturu, tłumačyć Kastuś Šytal:
«Jana napisała, što ja nibyta pravodziŭ niezakonnaje apytańnie vybarcaŭ, majučy na ŭvazie maju razmovu z navučencam prafiesijnaha liceja pra toje, ci dobraachvotna jon pryjšoŭ hałasavać daterminova. A taksama nibyta ja raźmiaściŭ niepraŭdzivuju infarmacyju ŭ internecie i pahražaŭ siabram vybarčaj kamisii».
Kastuś Šytal nie ličyć siabie vinavatym i budzie sprabavać davieści heta ŭ sudzie. Kali heta nie ŭdasca, to spadaru Šytalu pahražaje abo sudovaje papiaredžańnie, abo štraf pamieram da 15 bazavych vieličyniaŭ — heta bolej za paŭmiljona rubloŭ.
Šytal ličyć, što administracyjnaja sprava — heta pomsta za apublikavany artykuł «Niezaležny naziralnik pabačyŭ, jak falšavali vyniki vybaraŭ u Hłybokim», napisany z ułasnaha naziralnickaha dośviedu. Aprača hetaha, dla sajta westki.info Kastuś Šytal napisaŭ šerah materyjałaŭ pra padziei 19 śniežnia i ŭdzieł u minskaj akcyi jahonych ziemlakoŭ z zachodniaj Viciebščyny.
Admova ŭ praviadzieńni akcyi salidarnaści sa źniavolenymi paśla 19 śniežnia stała padstavaj dla razboru ŭ połackim sudzie, jaki pačaŭsia jašče 9 sakavika.
Viktar Kaleśnik, davieranaja asoba kandydata Andreja Sańnikava, sprabuje abskardzić zabaronu połackaha harvykankama pravieści akcyju salidarnaści 19 lutaha.
U piśmovaj admovie, jakuju atrymaŭ spadar Kaleśnik, było napisana: «U suviazi z tym, što mirnaja akcyja ŭ Minsku mieła niekanstytucyjny charaktar, pikiet nie moža być uzhodnieny dziaržaŭnymi orhanami, jakija ažyćciaŭlajuć svaje paŭnamoctvy ŭ adpaviednaści z Kanstytucyjaj Respubliki Biełaruś». Viktar Kaleśnik ličyć pryčynu admovy palityčna matyvavanaj:
«Ja zmahajusia ŭ sudzie za toje, kab kožny hramadzianin mieŭ prava na vykazvańnie svajoj dumki adnosna taho, što chvaluje, što adbyvajecca ŭ krainie. Pavodle Kanstytucyi, kožny maje takoje prava, ale treba, kab jaho nie parušali ni naš vykankam, ni ŭvohule dziaržaŭnyja orhany Respubliki Biełaruś».
Na dumku Kaleśnika, namieśnica staršyni Połackaha harvykankama Natalla Haniebnaja, zabaraniŭšy pravodzić pikiet, parušyła artykuły 19 i 21 Mižnarodnaha pakta ab hramadzianskich i palityčnych pravach.