15 hadoŭ tamu ździejśniŭ podźvih vajenny lotčyk Uładzimir Karvat
jaki staŭ pieršym Hierojem Biełarusi
Piatnaccać hadoŭ tamu ździejśniŭ podźvih vajenny lotčyk pieršaha kłasa načalnik pavietrana-ahniavoj i taktyčnaj padrychtoŭki 61-j źniščalnaj avijabazy padpałkoŭnik Uładzimir Karvat.
23 maja 1996 hoda ŭ 22 hadziny 54 chviliny pry vykanańni vučebna-trenirovačnaha palotu ŭ rajonie Baranavičaŭ (Bresckaja vobłaść) na samalocie Su-27P uźnik pažar. Mašyna stała hublać kiravańnie i padać. Stanovišča na borcie było krytyčnym. Kiraŭnik palotaŭ daŭ lotčyku kamandu na katapultavańnie. Adnak uličvajučy toje, što na šlachu źniščalnika znachodzilisia nasielenyja punkty Arabaŭščyna i Vialikaje Hacišča, Karvat pryniaŭ rašeńnie nakiravać samalot u bok i nie dapuścić padzieńnia na vioski. Apošnija 14 siekund palotu piłot, vykarystoŭvajučy minimalnyja mahčymaści ŭździejańnia na samalot, praciahvaŭ advodzić jaho ad nasielenych punktaŭ. Koštam ułasnaha žyćcia jon nie dapuściŭ hibieli ludziej na ziamli. Źniščalnik upaŭ na kaniušynnaje pole pamiž Arabaŭščynaj i Vialikim Haciščam.
Pavodle zaklučeńnia kamisii, jakaja rasśledavała pryčyny avijacyjnaj katastrofy, i na padstavie abjektyŭnaha kantrolu ŭstanoŭlena, što
lotčyk da apošniaj chviliny rabiŭ usio mahčymaje dla niedapuščeńnia padzieńnia źniščalnika na nasielenyja punkty.
Za mužnaść i hieraizm, prajaŭlenyja pry vykanańni voinskaha abaviazku, Uładzimiru Karvatu było paśmiarotna prysvojena zvańnie «Hieroj Biełarusi». Jon pieršym u krainie ŭdastojeny hetaha zvańnia. Imiem Karvata nazvana vulica ŭ mikrarajonie Ściapianka ŭ Minsku.
Uładzimir Karvat naradziŭsia 28 listapada 1958 hoda ŭ Breście, skončyŭ u 1981 hodzie Armavirskaje vyšejšaje vajenna-avijacyjnaje vučylišča lotčykaŭ, paśla čaho byŭ nakiravany dla prachodžańnia słužby na Daloki Uschod. Tut prajšoŭ šlach ad lotčyka da namieśnika kamandzira pałka pa lotnaj padrychtoŭcy. Lotaŭ na samalocie MiH-23. Pa ŭłasnym žadańni ŭ žniŭni 1994 hoda prybyŭ dla prachodžańnia słužby va Uzbrojenyja siły Biełarusi i byŭ pryznačany načalnikam pavietrana-ahniavoj i taktyčnaj padrychtoŭki 61-j źniščalnaj avijabazy.
Uładzimir Karvat — adziny vajenny ŭ śpisie hramadzian Biełarusi, udastojenych prezidentam zvańnia Hieroja. Paśla jaho jano prysvojvałasia pramysłoŭcam, ahraryjam, čynoŭniku, śviataru, bankiru i mastaku.
Čytajcie taksama:
Kamientary da artykuła