Adbyłosia ŭručeńnie premijaŭ u halinie abarony pravoŭ čałavieka
Milinkievič: «Usie siońniašnija laŭreaty mocnyja svajoj marallu i mužnaściu, jany nadajuć nam nadzieju i vieru. Heta prykłady mužnaści, jakija padymajuć biełarusaŭ z kaleniaŭ».
U pres‑centry «Chartyi‑97» adbyłosia ŭručeńnie Nacyjanalnych premij «Za asabistuju mužnaść pry abaronie pravoŭ čałavieka». Kaardynatar «Chartyi‑97» Źmicier Bandarenka skazaŭ, što choć heta i ŭračystaja chvilina, ale «z horkim prysmakam».
Premija ŭ halinie abarony pravoŭ čałavieka ŭručajecca ad 1998 hodu. Sioleta laŭreatami stali eks‑kandydat u prezydenty Alaksandar Kazulin, abaroncy namiotavaha miastečka na Kastryčnickaj płoščy, palitviazień Źmicier Daškievič, prafsajuznaja aktyvistka z Babrujsku Alena Zachožaja, a taksama vierniki pratestanckaj carkvy «Novaje žyćcio».
Za Alaksandra Kazulina premiju atrymała žonka, za Źmitra Daškieviča — baćki, za abaroncaŭ namiotavaha miastečka — Darja Zialinskaja.
— Toje, što zrabiŭ Kazulin jość sapraŭdnym podźviham, — skazaŭ pravaabaronca Andrej Sańnikaŭ. — Ja sam pracavaŭ u AAN i viedaju, nakolki ciažka i składana pastavić pytańnie ŭ Radzie biaśpieki AAN, ale jon damohsia svajho.
— Heta premija nia tolki mnie, ale i ŭsim viernikam Biełarusi, — adznačyŭ pastar carkvy «Novaje žyćcio» Viačasłaŭ Hančarenka. — A taksama jana naležyć Bohu.
Na ŭračystaści vystupiŭ i lider demakratyčnych siłaŭ Alaksandar Milinkievič:
—Kali ja vučyŭsia ŭ škole, to nieadnojčy čuŭ nastupnuju frazu: «Masy vyrašajuć usio». Tak, sapraŭdy, masy vyrašajuć mnohaje, ale nielha admaŭlać i rolu asoby ŭ historyi. Siońniašnija naminanty dakazvajuć heta. Heta prykłady mužnaści, jakija padymajuć biełarusaŭ z kaleniaŭ. Usie siońniašnija laŭreaty mocnyja svajoj marallu i mužnaściu, jany nadajuć nam nadzieju i vieru.
Źleva naprava: Viačasłaŭ Hančarenka, Darja Zialinskaja, Iryna Kazulina, Alena Zachožaja, baćki Źmitra Daškieviča.
Baćki Źmitra Daškieviča.
Darja Zialinskaja.
Viačasłaŭ Hančarenka, Iryna Kazulina.
Alaksandar Milinkievič.