Ruch «Za Svabodu» prosić u MUS tłumačeńniaŭ
jakija srodki samaabarony mohuć prymianiać mirnyja hramadzianie ŭ dačynieńni da nieviadomych asob, što napali na ich.
Ruch "Za Svabodu" prosić MUS rastłumačyć, jakija srodki samaabarony mohuć prymianiać mirnyja hramadzianie ŭ dačynieńni da nieviadomych asob, što napali na ich.
Jak paviedamiŭ namieśnik staršyni arhanizacyi Juryj Hubarevič, ruch vyrašyŭ źviarnucca ŭ MUS u suviazi z tym, što "ŭ apošni čas fiksujucca šmatlikija fakty napadu nieviadomych hramadzian na prachožych u roznych haradach krainy". "Ludzi ŭ cyvilnym, užyvajučy hrubuju fizičnuju siłu, chapajuć mirnych hramadzian i, u niekatorych vypadkach źbivajučy ich, zaciahvajuć u aŭtamabili, aŭtobusy (časta biez numaroŭ) ci transpartnyja mašyny śpiecnaza. Paśla hetaha ich dastaŭlajuć u adździaleńni milicyi, dzie paviedamlajuć pra toje, što jany źjaŭlajucca zatrymanymi ŭ miežach administracyjnaha pracesu", — adznačyŭ Hubarevič.
U ruchu "Za Svabodu" ličać, što praktyka takich zatrymańniaŭ u dačynieńni da hramadzian, jakija realizujuć svajo prava na svabodu słova i svabodu mirnych schodaŭ, supiarečyć pałažeńniu Usieahulnaj dekłaracyi pravoŭ čałavieka ab tym, što nichto nie moža być samavolna aryštavany ci zatrymany; hrubym čynam parušaje kanstytucyjnyja pravy i svabody čałavieka; u surjoznaj stupieni pazbaŭlaje čałavieka srodkaŭ abarony i pracesualnych harantyj spraviadlivaha razhladu.
U suviazi z hetym, paviedamiŭ Hubarevič, arhanizacyja źviarnułasia ŭ MUS Biełarusi z nastupnymi pytańniami:
- jakija zakonnyja srodki samaabarony mohuć być užytyja mirnymi hramadzianami ŭ dačynieńni da nieviadomych asob, jakija napadajuć na ich;
- jakija zakonnyja srodki samaabarony mohuć być užytyja mirnymi hramadzianami ŭ vypadku, kali napadajučyja źjaŭlajucca pieraapranutymi ŭ cyvilnaje adzieńnie supracoŭnikami padraździaleńniaŭ MUS, ale pry zatrymańni mirnych hramadzian jany nie vykonvajuć praduhledžanuju zakonam praceduru zatrymańnia, časam užyvajučy pry hetym fizičnuju siłu i śpiecyjalnyja srodki;
- u vypadku kali zatrymańnie mirnych hramadzian ažyćciaŭlajuć supracoŭniki padraździaleńniaŭ MUS, ale pry hetym niezakonna ŭžyvajuć fizičnuju siłu i śpiecyjalnyja srodki, nie vykonvajuć praduhledžanuju zakonam praceduru zatrymańnia, jakija zakonnyja srodki samaabarony mohuć być užytyja mirnymi hramadzianami ŭ adkaz na zaviedama niezakonnyja dziejańni supracoŭnikaŭ MUS.
Hubarevič paviedamiŭ, što hetyja pytańni 4 lipienia byli adpraŭlenyja ŭ MUS praz aficyjny internet-sajt ministerstva. "Adnak na sajcie adznačana, što padobnyja paviedamleńni nie padpadajuć pad zakon "Ab zvarotach hramadzian" i mohuć zastacca biez adkazu. Tamu, vierahodna ŭžo siońnia, zvarot budzie pieradadzieny ŭ MUS u piśmovym vyhladzie", — skazaŭ jon.
Siarhiej Karalevič, BiełaPAN.