Viarchoŭny sud adchiliŭ skarhu BCHK na papiaredžańnie Miniusta
Viarchoŭny sud 28 lipienia adchiliŭ skarhu RHA "Biełaruski Chielsinkski kamitet" (BCHK) na rašeńnie Miniusta ab vyniasieńni ŭ hetym hodzie druhoha papiaredžańnia arhanizacyi.
Jak paviedamiŭ staršynia BCHK Aleh Hułak, u Miniusta "farmalna źjaviłasia pryčyna inicyjavać spravu ab likvidacyi arhanizacyi, adnak jon nie abaviazany heta rabić". "Heta pytańnie palityčnaj voli. Spadziajusia, ćviarozy sens pieramoža, i my budziem mirna isnavać", — skazaŭ jon.
Miniust vynies druhoje sioleta piśmovaje papiaredžańnie BCHK 6 červienia. Pryčynaj dla papiaredžańnia stali "parušeńni padatkovaha zakanadaŭstva, jakija nosiać praciahły charaktar".
Kanflikt pamiž padatkovaj inśpiekcyjaj i BCHK, adzinaj zarehistravanaj u Biełarusi pravaabarončaj arhanizacyjaj, ciahniecca ŭžo bolš za piać hadoŭ. Padatkovaja inśpiekcyja pradjaviła pretenzii da BCHK za niavypłatu padatkaŭ na srodki, atrymanyja ŭ jakaści humanitarnaj dapamohi pa prahramie TASIS.
Letam 2004 hoda haspadarčy sud Minska źniaŭ z BCHK abvinavačańni pa ŭchileńni ad vypłaty padatkaŭ pa srodkach, zadziejničanych u miežach prahramy TASIS, adnak heta rašeńnie apratestavaŭ namieśnik staršyni Vyšejšaha haspadarčaha suda Jaŭhien Śmirnoŭ. U śniežni 2004 hoda prezidyum Viarchoŭnaha suda zadavoliŭ jaho pratest i abaviazaŭ BCHK vypłacić padatki i štrafnyja sankcyi ŭ sumie, ekvivalentnaj prykładna 75 tys. dołaraŭ. 1 listapada 2006 hoda haspadarčy sud Minska pastanaviŭ kanfiskavać častku majomaści BCHK na 255 tys. rubloŭ u lik vypłaty 160 młn. rubloŭ štrafu i padatkovych zavinavačanaściaŭ.
Pieršaje ŭ hetym hodzie papiaredžańnie było vyniesiena BCHK 12 studzienia. Miniust źviarnuŭ uvahu na dziejnaść abjadnańnia paśla taho, jak pravaabaroncy nakiravali paviedamleńnie pra nacisk na advakataŭ — abaroncaŭ fihurantaŭ spravy ab padziejach 19 śniežnia, a taksama pra inšyja fakty pieraśledu i zapałochvańnia advakataŭ u Biełarusi. Paviedamleńnie było nakiravana śpiecyjalnamu dakładčyku AAN pa pytańniach niezaležnaści sudździaŭ i advakataŭ Habryele Knaul. Na dumku Miniusta, "mieła miesca raspaŭsiudžvańnie niedakładnaj infarmacyi, jakaja dyskredytuje pravaachoŭnyja orhany i orhany justycyi Respubliki Biełaruś".