Hienprakuratura praviaraje infarmacyju pra haładoŭku i sproby suicydaŭ u Hłybockaj kałonii № 13

Jak paviedamili BiełaPAN u Hienprakuratury, situacyja ŭ kałonii vyvučajecca.

U MUS prakamientavać situacyju paabiacali paźniej.

Infarmacyja pra padziei ŭ Hłybockaj PK-13 była raspaŭsiudžanaja ŭ ŚMI 28 lipienia infarmacyjna-aśvietnickaj ustanovaj «Płatforma», jakaja zajmajecca pytańniami vykanańnia zakanadaŭstva ŭ papraŭčych ustanovach.

Paviedamlałasia, u pryvatnaści, što niekalki źniavolenych kałonii sprabavali pakončyć z saboj. Jak raskazaŭ BiełaPAN dyrektar ustanovy «Płatforma» Andrej Bandarenka, źviestki pastupili ad čałavieka, jaki niadaŭna vyzvaliŭsia z PK-13. Pavodle jaho słoŭ, u červieni asudžanyja abjavili haładoŭku, pratestujučy takim čynam suprać parušeńnia zakonnaści z boku administracyi kałonii, u tym liku — prymianieńnia fizičnaj siły. Udzielniki haładoŭki patrabavali sustrečy z hienieralnym prakuroram Biełarusi.

«U adkaz administracyjaj kałonii ŭ pieryjad z 16 pa 22 červienia byli masava źbityja asudžanyja. Bolšaść ź ich, jakija zaznali takija miery, nie mahli pierasoŭvacca samastojna, adnak miedycynskaja dapamoha im nie akazvałasia. Niekatoryja byli zmušanyja źviarnucca da ekstremalnych mier samaabarony — sprobaŭ suicydu. Tak, asudžanyja Kanciava i Čykin, nie znachodziačy inšych srodkaŭ abarony svaich pravoŭ i hodnaści, uskryli sabie vieny i žyvot», — raskazaŭ Andrej Bandarenka.

1 žniŭnia ŭ Minsku płanujecca pres-kanfierencyja, na jakoj žurnalistam abiacajuć paviedamić padrabiaznaści.

Čakajecca, što ŭ joj buduć brać udzieł śviedki katavańniaŭ, imiony jakich nie nazyvajucca ź mierkavańniaŭ ich biaśpieki.

27 lipienia ŭstanova «Płatforma» nakiravała ŭ departamient vykanańnia pakarańniaŭ MUS, Hienieralnuju prakuraturu i upraŭleńnie ŭłasnaj biaśpieki MUS zvarot z patrabavańniem rasśledavać incydenty ŭ papraŭčaj kałonii № 13 horada Hłyboka

Kamientary da artykuła