Rasijski «Jo-mabil» stvarajuć biełarusy
Biznesoviec Andrej Birukoŭ, kanstruktar Andrej Hinzburh, dyzajnier Andrej Trafimčuk — usie jany znajšli siabie za miažoj.
Šmatmiljonny aŭtamabilny prajekt uschodnich susiedziaŭ «Jo-mabil» tak ci inačaj zakranie biełaruski rynak.
Ahulnaja mytnaja prastora dazvolić pryvozić «Jo-mabili» ŭ našu krainu biez usialakich prablem. Ale ž Biełaruś choča jašče i źbirać mašyny ŭ siabie! Hod da pačatku kamiercyjnaj vytvorčaści — samy čas, kab paznajomicca z «Jo-mabilem» bližej i znajści jaho biełaruskija karani.
Elektrastancyja na kołach
Što ž takoje «Jo-mabil»? Heta hibrydny aŭtamabil, jaki vykarystoŭvaje bienzin i haz dla vydzialeńnia enierhii. Tamu «Jo-mabil» možna nazvać mini-elektrastancyjaj. Enierhija ŭ im budzie nazapašvacca i zachoŭvacca nie ŭ akumulatarnych batarejach (jak zvyčajna), a ŭ supierkandensatarnych elemientach, jakija nikoli raniej nie ŭžyvalisia ŭ aŭtavytvorčaści. Dziakujučy hetamu
raschod paliva składzie ŭsiaho 3,5 ł/100 km.
Historyja aŭtamabila pačałasia letaś, kali jaho stvareńnie anansavali rasijskaja inviestycyjnaja hrupa ANEKSIM miljardera Michaiła Procharava i biełaruska-rasijskaja kampanija «Jaravit Motars» biełarusa Andreja Birukova. Jany i stvaryli AAT «Haradski aŭtamabil», paźniej pierajmienavany ŭ «Jo-Aŭto».
Biełaruskaja nazva…
Voś tut samy čas pačać havorku pra biełaruskuju sutnaść prajekta. Pa-pieršaje,
nazvu dla «Jo-mabila» prydumaŭ biełaruski dyzajnier Uładzimir Ceśler.Jamu ŭdałosia pierakanać Procharava, što litara «Jo» źjaŭlajecca ŭnikalnaj. Pa-druhoje, mienavita Ceśler prapanavaŭ dvuchkolernuju afarboŭku aŭtamabilaŭ, abraŭšy adnym z koleraŭ «słanovuju kość».
…i biełaruskija stvaralniki
Chto ž taki Andrej Birukoŭ? Hienieralny dyrektar «Jo-Aŭto», jaki ažyćciaŭlaje ahulnaje kiraŭnictva prajektam, vyras i pačynaŭ svoj biznes u Biełarusi. Pierajechaŭšy ŭ susiedniuju Rasiju, jon zachapiŭ z saboj i hrupu adnadumcaŭ — biełaruskich inžynieraŭ, jakija nie znajšli dla siabie naležnaj pracy ŭ našaj krainie.
Siarod ich faktyčny stvaralnik — hałoŭny kanstruktar novaha aŭtamabila Andrej Hinzburh — i šef-dyzajnier prajekta Andrej Trafimčuk. Praŭda, i pieršy, i druhi nie zdabyli i adsotka ad toj słavy, jakaja dastałasia sponsaru prajekta Michaiłu Procharavu.
Moža, zastalisia b jany na radzimie, dyk u Biełarusi stvaraŭsia b prajekt «Ŭ-mabil»…
Termin hatoŭnaści — hod
U kancy 2012 hoda ŭ prodažy pavinny źjavicca try madeli «Jo-mabila». Heta mikraven, krasovier i furhon. Maksimalnaja chutkaść usich mašyn — 120 km/h. Pieršy zavod pa vypusku aŭtamabilaŭ budzie pabudavany pad Pieciarburham u industryjnym parku «Marjina». Tam zmohuć rabić 45 tysiač mašyn štohod, ale hetaha budzie vidavočna niedastatkova. Zapuščany ŭ mai sajt, na jakim možna było pakinuć zajaŭku na aŭtamabil, prosta łamiŭsia ad papularnaści. U pieršy ž dzień takoje žadańnie vykazali 50 tysiač čałaviek — bolš čym hadavy abjom vypusku!
Za tydzień kolkaść achvotnych darasła da 100 tysiač.U suviazi z takoj papularnaściu prajektu Biełaruś vykazała žadańnie adkryć u siabie paralelny vypusk aŭtamabila. Biełaruski dziaržkamitet pa navucy i technałohijach nakiravaŭ u Rasiju prapanovu stvaryć biełaruskaje adździaleńnie pa vypusku jo-mabilaŭ. Adkazu ad Procharava pakul nie było.
Viadro dziohciu
Siarod akijanu rasijskaha aptymizmu hučać i hałasy skieptykaŭ. Fantastyčny prajekt nie bačycca im realna ažyćciaŭlalnym. I padstavy dla krytyki jość.
Adsutnaść dośviedu ŭ raspracoŭščykaŭ, dziŭnyja kanstruktarskija rašeńni, jakija nie dazvalajuć praličyć biaśpieku kiroŭcy padčas avaryi, ryzyka karotkaha zamykańnia «elektrastancyi na kołach» prymušajuć zadumacca, čaho ŭ prajekcie bolš — sapraŭdnaj pracy ci pijaru vieličy rasijskaha aŭtarynku.Adkazy na pastaŭlenyja pytańni buduć dadzienyja ŭ 2012-m, kali pieršyja entuzijasty zapłaciać $12--15 tysiač i siaduć za styrno biełaruskaj idei, vykananaj za rasijskija hrošy.